Cuye de muhîmeya ziwanî

Ziwan rihê esteyê ganê mêrdimî yo. Ziwan welat o, ziwan rûmet o, ziwan kultur o, ziwan huner o. Ziwan hewayê şitê may o. Ziwan heme çîyê miletî yo. Eger ziwanê mêrdimî çinî bo, o mêrdim kerr û lal o xax o.  Ha mêrdimo bêziwan, ha mêrdimo qestikên, wirdî zî eynî çî yê. No sebeb ra zî bi tena qalîkerdişê ziwanî qîm nêkeno. Ganî wendiş û nuştişê ziwanî bibo û taybetî zî ganî perwerdeyî yê ziwanê dayîke bibo. 

Ewro ziwanê kurdkî fermîyet de nîno qebulkerdiş û statûye kurdkî çin o. Ziwan xoser yew pirsgirêko û yew dejo pîl o. No hewa zî seba averşîyayîşê ziwanî zor û zehmet o.  Heme çî ra ver ganî merdim ziwanê xo ra bi zerrî ra hes bikero  û qalîkerdiş de haz bigîro. La çi heyfo ke helînayîşê asîmîlasyonî zaf zor dayo ziwanê kurdkî. 

Ewro ma cuyayîşê kurdkî ra ewnenê,  ziwan zaf- zaf apey mendo. Eke dewan de, kuçeyan de, qahveyan de, bazaran de, bi zafî ziwanê kurdkî qalî nêbeno, no tehlukeyo pîl o. Verê dewan de qalîkerdişê tirkî çin bî û rewa rew zî çew nêzaneno ziwanê tirkî qalî bikero. La ma ewro ewnîyenê ke gedeyî bi zafî ziwanê tirkî qalî kenê. Bi taybetî mayî zî gedeyanê xo reyde tirkî qalî kenê  û haz gênê, no tewir qalîkerdiş ra. Kuçeyan de zî  qahweyan de zî eynî çî beno. En muhîm zî sîyasetê kurdan de, partîyan de dezgeyan de, zafê înan sîyasetê xo de ziwanê tirkî şixulnenê. Nê tewr rewşe zî eyb o û şermêko pîl o. Seba ke ziwanê kurdkî pere nêkeno û însanê ma zî qîymet nêdano ziwanê  xo. Amed paytextê Kurdîstanî yo, la wexto ke ma dersxaneyê îngîlîzkî ra ewnîyenê, hema hema herkes gedeyanê xo erşaweno dersxaneyê kursê îngîlîzkî.

La kursê kurdkî bêpere yo yew gedeyanê xo nêerşaweno kursê kirdkî, yan yê kurmancî. Çi rê? Çunku ziwanê kirdkî pere nêkeno. En çîyo muhîm zî îdareyê herêmî û şaredarîye qîmet nêdanê kurdkî. Gelo şaredarî çiqas qîmet danê ziwanê kurdkî û çiqas ziwanê kurdkî yeno qalîkerdiş?  Nê çîyan wexto ke merdim fikirîyeno, aqilê merdimî vindeno. Nê heme pirsgirêkî girêdayeyê rewşa rêxistinî yê. Eke rêxistinî çin bo, yan zî weş organîze nêbo, halê ma raşte de yo. Ma her wext xo bi xo, xo dibare kenê û eynî çîyan vanê. Bi rojanê taybete de 21ê Sibate de yan zî 15ê Gulane de, muhîmîya ziwanî anê xo vîrê û badî zî xo vîrî kenê. 

Seba ziwanê dayîke, ma eşkenê bi rewşa asanî ra zaf xebatan bikerê. Ganî verê verkan akademîya ziwanî bivirazê. Akademî de mamosteyî xo rêxistin bikerê û tezê xo hedre bikerê. Ganî her dewe de, her taxe de, yew keyeyê perwerdeyê ziwanî bibo. Her şaredarî eşkena binê banê xo de keyeyê zarokîstanî û xalxalokî zaf abikerê. Bi taybetî zî zarokîstanî û xalxalokî bêpereyî bibê. 

Seba ke ziwanê kurdkî pere bikero

Seba ke ziwanê kurdkî pere bikero û qîymet bo, ma eşkenê no war de zaf çîyan bikerê. Êyê ke hemserekê partî û îdarekerê partî benê, bi şerto verên ganî kurmancî û kirmanckî weş bizanê. En muhîm zî hemşaredarî, endamê meclîsan û xebatkarê şaredarî  ganî kurmancî û kirmanckî weş bizanê. 

Ma ewro ra pey eşkenê nê şertanê ziwanî bigurênê. Nê şertî heyana ewro zaf amey vatiş, la her wext peygoş kerdî. Ma her wext vanê ziwanê kurdkî xeta sûr a. La ma ganî na xeta sûra xo mîyanî de bigurîyê. No sebeb ra roja roşanê ziwanê kurdkî ya heme şarê ma fîraz bo...