Qelema heqîqetî: Evîn Buldan rê
Rojnamegeriya azade, bi bedelan, bi keda cinîyan u bi qelema raştîye ameya nê rojan. Na qeleme, zaf rey destê qehremanan de bîye. Inan ra yewe zî, embaza ma, rojnamegera wêreke Evîn Buldan bîye. Evîna ke seba ziwano kurdkî û heqîqetî xo feda kerdi bi, ewro zî zerrîya ma de, tarîxê çapemenîya azade de, bi keda xo ya pîye ciwîyena. Aye, tarîtîya ke serê şarê ma de ameyêne viraştene, bi roşnîya qelema xo parçe kerd.
Evîn Buldan, serra 1990î de qezaya Colemêrgî, Gever de ameye dinya. Labelê, weşîya aye, weşîya asane nêbî. Hema ke 4 serre bî, seba zilm u zextê dewlete, keyeyê xo dir mecbûr mende ke welatê xo biterikno. Rayîrê koçberîye dest pêkerd û heta Kampa Mexmûrî şî. Evîn, uca de, binê şertanê giran de, mîyanê zehmetîyan de bîye pîl. La zerrîya aye de tim hesretêka pîl, hesreta welatî bîye. Aye zanayêne ke rojeke do agêro welatê xo û seba şarê xo, seba ziwanê xo bixebitiyo. No hesret û waştiş, bîye semedê asayîşê xeyalanê aye. Aye xo bi xo rê vatêne; 'Gereka ez biba vateyê şarê xo.'
Zanîngeha Selaheddînî de beşê Radyo û Televîzyonî wend. Dima ra, aye no sozo ke xo rê dabi, ard ca. Agêraye welatê xo, agêraye paytextê kurdan Amedî. Serra 2011î de rojnameyê 'Azadiya Welat' de dest bi rojnamegerîye kerd. Seba Evîne, ziwan, qeybîyena xo, estbîyayîşê xo bî. Aye tenya bi kurdkî qisey kerdêne û bi kurdkî nuştêne. Ziwano kurdkî de israrê aye, hemverê asîmîlasyon û polîtîkayanê înkarî de yew tewir bî. Rengê xo, vengê xo bi ziwanê dayîke dabi naskerdene. Wexto ke rojnameyê Azadiya Welat bi KHK’î ame padayîş, aye qet rîyê xo nêna ro û dest qelema xo ra nêverada. Na rey, rojnameyê 'Rojeva Medya' de sey edîtore xebata xo domne û heqîqet resna şarê xo.
Evîne, bi rîyê huye, bi zerrîya xo ya pak, bi enerjîya xo û bi evîna xo ya qehremanîye ameyêne zanayîş. Embazê aye, aye sey 'aşiqa ziwan u welatê xo' name kenê. Wexto ke vengûvajan nuştêne, derd û kulê şarê xo, raştîya Kurdistanî ardêne ziwan. Aye, mîrasê Gurbetellî Ersoz, Denîz Firat û Nûjiyan Erhanan girewt bi. Tim vatêne: 'Ma do qelema Gurbetellîyan erd de nêverdê.' û no qerarê xo, heta nefesê xo yo peyên, heta roja xo ya peyêne ard ca. Aye zanayêne ke heqîqet tu wext nêno wedaritene.
Tarîx 2yê Nîsana 2017î bî... Amed de, wexto ke şîyêne keyeyê xo, verê çêberî de krîzê zerrî derbas kerd. Hema 27 sere bîye. Panca emrê xo yo tewr weş de, mîyanê xebata xo de bîye. Mergê aye, çapemenîya azade û embazanê aye mîyan de dejêko pîl, birînêka xorîn viraşt. Yew ciwanîya bienerjî, yew qelema wêrek, yew vateyê ziwano şîrin, zaf rew ma ra bîye cîya. Labelê Evîne, tenya nêşîye. Aye dima xo mîrasêko ercîyaye, xoverdayîşêko bêhempa, heqîqetêko qewîn û qelemêka qehreman verda.
Ey Evîna delale, ey cinîya wêreke... Ewro ma, embazê to vanê; Evîn, ma to qet vîrî nêkenî. Xeyalê to, waştişê to û keda to, do tim u tim rayîrê ma roşnî biko. Qelema to, do ziwano ke to zaf hes kerdêne, mîyanê rîpelanê kurdkî de binusîyo. Qelema to ewro destê bi seyan cinîyanê rojnamegeran de ra û ameya berz kerdene. Xebata to ya raştîye nêqedîyaya. Ma, heta ke tariyîye bibo roşnî, do qelema to erd de nêverdê. Cayo ke ti tede rakewtîya, wa bi gul û nûr bo. Ti her tim zerrîya şarê xo de, rîpelanê çapemenîya azade de ciwîyena. Ruhê to şad, cayê to cinet bo, qelema ma ya heqîqetî...
