Vîrardişê Bilbilê Xemgînî: Mihemed Şêxo

Mihemed Şêxo ke mîyanê komelê kurdan de bi nameyê "Bavê Felek" (Pîyê Felekî) û "Bilbilê Xemgîn" (Bilbilo Xemgîn) yeno naskerdene, 9ê Adarê 1989î de bajarê Qamişloyî de şî heqîya xo. Ewro, yanî serra 2026î de, serê wefatê nê senatkarê pîlî ra tam 37 serrî vîyartî. Labelê vengê ey, deyîrê ey û xoverdayîşê ey qetî nêameyî vîrakerdene. O, teyna yew hunermend nêbî, eynî wext de yew welatperwero pîl, şoreşgêrêk û xoverdayoxêko qehreman bî

Mihemed Şêxo, serra 1948î de dewa Xecokê ya Qamişloyî de ame dinya. Nameyê ey o raştikên Mihemed Salih Şêxmus o. Wexto ke o xort bî, eleqeyê ey bi muzîk û hunerî dest pêkerd. Serranê xo yê xortîye de dest bi cinitişê tembûrî û biziqî kerd. Hunerê xo, derd û kulê şarê xo, hesreta welatî û eşqê azadîye ser o awan kerd. Bi vengê xo yê zîzî, deyîrê ke vatênê, zerreyê goşdaranê xo lerznayênê. Deyîrê ey teyna hesret nê, eynî wext de vengdayîşê têkoşînî zî bîyî.

Aram Tîgranî şinasîya

Cuyayîşê Mihemed Şêxoyî zey tarîxê şarê xo, bi surgun, zindan, koçberî û zehmetîyan vîyart. Seba ke ey bi ziwanê kurdkî deyîrî vatênê û heqê şarê xo pawitênê, tim rastê zext û tedayanê rejîmê Sûrîye ame. Coka mecbur mend ke welatê xo terk bikero. O verî şî Lubnan, uca de bi hunermendanê pîlan ê zey Aram Tîgranî ra şinasîya û xebatê muzîkî kerdî. Dima ra derbazê Başûrê Kurdîstanî û Rojhelatê Kurdîstanî bî. Nê waran de zî ey xizmetê huner û muzîkê kurdkî kerd. Kamcîn perçeyê Kurdîstanî rê şî, uca de bi coş ame pêşwazîkerdene. Şoreşa Başûrî de sey pêşmergeyêk ca girewt û bi tembûrê xo moral da şar û şervanan.

Tepişîya û zindanî de mend

Labelê zext û zilmî qetî peyê ey nêverda. Wexto ke Îran de bî, uca zî seba xebatanê xo yê neteweyîyan ame tepiştene û zindanî de mend. Zindan de zî ey tembûrê xo, xo dima nêverada, bi qelem û qaxizê xo, hesret û xoverdayîş kerdî deyîrî. Dima ra agêyra Rojavayê Kurdîstanî, şaristanê Qamişloyî. Labelê rejîmê Baasî uca zî o rihet nêverada, reyna eşt zindan. Bi nê heme zehmetîyan zî, Mihemed Şêxoyî qetî çok nêda û tim kerd qîrê vateyê heqîqetî. Ey şîîrê şaîranê pîlan ê zey Cegerxwîn, Bêbihar û Melayê Cizîrî kerdî beste û resnayî neslê neweyî.

Zerrîya ciwanan de cuyena

Mihemed Şêxo, 9ê Adarê 1989î de, wexto ke hîna 41 serre bî, nêweşîyêka girane ra dima dinya ra bar kerd. Wefatê ey, mîyanê şarê kurdî de xemginîyêka xorine kerde vîla. Cenazaya ey bi beşdarbîyayîşê des hezaran kesan, bi sloganan û girîyîşî şaristanê Qamişloyî de ameye definkerdene. A roje, merasîmê cenazaya ey bîyî mîtîngêkê xoverdayîşî. Ewro, serê wefatê ey ra 37 serrî vîyartê. Labelê qasetê ey, deyîrê ey ê zey "Ay Lê Gulê", "Eman Dilo", "Welat Namûs e", "Kewê" û "Pêşmerge" hêma zî fekê şarî de yê û zerrîya ciwanan de cuyenê.

Heta ke komelê kurdan esto û ziwanê ma yeno qiseykerdene, vengê Bavê Felekî do tim asmênê welatî de bideqerîyo. O sey bîrdarîyêka hunerî û welatperwerîye tarîx de ca girewto û do qetî nêro vîrakerdene. Rihê ey şad û ca yê ey bihişt bo.