1ê Gulane roja yewîya têkoşînê kede û azadîye ya

1ê Gulane, tarîxê merdimîye de roja xoverdayîş, yewbînangirewtiş û pawitişê heqanê karkeran a. Kokê na roje xoverdayîşê karkeranê Şîkagoyî ra yeno ke seba heşt saetî xebate canê xo da. Na roje, ewro tena roja şayîye û pîrozkerdişî nîya, eynî wext de roja waştişê heqan, edaletê komelî û qîrayîşê azadîye ya. Dinya de û welatê ma de, bi mîlyonan karker û kedkarî seba ke keda xo, rûmetê xo û ameyeyê xo bipawê, vejîyenê meydanan. Keda karkeran, bingehê cuye ya; bê ked, cuyayîş nêbeno, bînayî nêvirazîyenê, nan nêpijîyeno. Labelê, sîstemo kapîtalîst û desthilatdarîya sermayeyî, tim wazenê ke kedû heqê karkeran bico, binpê bikero û înan tecrîd bikero.

Birînêka xorîn û qirkerdiş

Tirkîya de rewşa asayîş û weşîya karî zaf xirab a û no yew birînêka xorîn a. Her serre, bi hezaran karkerî qezayanê karî de, yan zî bi nameyêko hîna raştkên 'qirkerdişê karî' de canê xo vîndî kenê yan zî seqet manenê. Şertê giranî yê xebate, bêsîgorteyîye, maeşo şenik yê asgarî û nêpawitişê weşîya karkeran, bîyê parçeyêko normal yê nê sîstemî. Karkerî bê asayîş, binê tehlukeyî de û binê psîkolojîyêka zaf giran de xebetîyenê. Nexweşîyê karî ra bi hezaran merdimî weşîya xo ra benê. Hukmat û rayedarî seba asayîşê karkeran tedbîran nêgênê, qanûnê ke estê zî pratîk de nêyenê xebitnayîş. Karkerî, xususen karkerê taşeronî, qezenc û rantê sermayedarîye rê benê qurban. Bi taybetî karkerê înşeatî, xebatkarê madenî, karkerê tekstîlî û ê fabrîkayan, mîyanê şertanê zaf giranan de mergî dir xebetîyenê. Asayîşê karî, heqêko bingehîn o.

Têkoşînê kurdan de zî rolê karkeran zaf muhîm o û wayîrê manayêka hîna xorîn û zafhetî ya. Karkerê kurdî, hem hetê sinifî ra sey karker hem zî hetê nasnameyî ra sey kurd, rastê zext, zorbazîyî û cîyekarîye yenê. Yanî kedkarê kurdî, bindestê bindestan ê. Sîyasetê koçberkerdişî û vêşnayîşê dewan yê serra 90î, domanê kurdan kerdî karkerê erjanî yê şaristananê metropolan. Karkerê mewsimî yê zîretî ke her serre Kurdîstan ra şinê rojawanê Tirkîya û herêmê Deryayê Sîyayî, uca de raştê hêrişanê nîjadperestan yenê. Ê binê şertanê nêmmerdimkîyan de, çadiran de cuyenê û bê heq û hîqûq xebetîyenê. Keda înan yena dizdîyene û nasnameyê înan yeno înkarkerdiş. Cinîyê karkerî û karkerê ciwanî zafêr raştê nê îstîsmarî yenê.

Têkoşînê azadîye yê kurdan

Coka, têkoşînê azadîye yê kurdan û têkoşînê karkeran yê seba kede, nêeşkenê yewbînan ra bêrê abirnayîş; ê yewbînan temam kenê. Bê xelisîyayîşê karkeran û bê rûmetkerdişê kede, azadîya komelî nêbena; bê azadîya komelî û bîyîşê heqanê neteweyî zî, karkerî nêeşkenê bi temamî heqanê xo bîgêrê û serkewê. Karkerê kurdî û sîyaseta înan ya kede, serkêşîya nê têkoşînî kenê. Têkoşînê sîyasî yê kurdan, eynî wext de yew têkoşînê sinifî yo zî. Vera feqîrîye, bêkarîye û talankerdişê xoza û kede, vindertiş ferz o. Pergalo kapîtalîst bi asîmîlasyon û qedexekerdişê ziwanî, wazeno karkeranê kurdan bê îrade verado. La xoverdayîşê karkeran, nê planan pûç keno. Têgihê azadîye, bi keda destê karkeran hîna manadar beno.

1ê Gulane seba karkeranê kurdan û pêro kedkaranê welatî, roja xurtkerdişê yewîye, xoverdayîş û ronayîşê hêvîye ya. Ganî pêro karkerî, sendîkayî, partîyê sîyasî û dezgehê komelî dest bidê yewbînan û vera nê sîstemê îstîsmarî û înkarî yew cephe ronê. Seba asayîş û weşîya karî, seba cuyêka bi rûmet, seba qedrê kede û seba azadîya şaran, têkoşîn rayîro yewane yo. Karkerî dinya viraştê û ê do pergalêko newe û adîl zî awan bikerê.

Wa roja karkeran û kedkaran firaz bo.

Biciwîyo 1ê Gulane!