AHRS ra muracatê NY: Ma do vera remnayîş û şîdetê vera cinîyan ê Sûrîye de bêveng nêmanê!

Komela Heqanê Merdiman a Sûrîye (AHRS) eşkera kerd ke înan derheqê hedîseyanê remnayîş, vîndîkerdîşê bi zorî û şîdetê zayendî yê vera cinî û kênayanê qijan de, Yewîya Cînîyan a Neteweyanê Yewbîyayan (UN Women) û Ofîsê Komîserîya Berz a Heqanê Merdiman ê Neteweyanê Yewbîyayan (OHCHR) rê muracatêko fermî kerd.

Eşkerayî de ke bi îmzaya Serekê AHRS’î Hasan Ogutcu  ameya weşanayîş, ame dîyarkerdene ke nê îxlalî ke nê wextanê peyênan de zêde bîyê, tena hedîseyê ferdî nîyê, labelê bîyê parçeyêko sîstematîk yê problemanê heqanê merdiman.

‘Cinî û domanê elewî rîsk de yê’

AHRSî dîyar kerd ke înan îxlalê heqanê merdiman ê vera cinî û kênayanê qijan ê Sûrîye de kerdê belge û îfadeyê mexdûr û şahidî berdê dayê mekanîzmayanê mîyannetewan. Eşkerayî de binê ci ame xêzkerdene ke cinî û kênayê ke mensûbê komelê elewî yê zereyê rîskêko pîl de yê, xeylê hedîseyê remnayîş, zordestîye, girewtiş û îstîsmarî ameyê qeydkerdene.

Ame dîyarkerdene ke tayê hedîseyan de îdiayê şîdetê zayendî û tecawuzî zî est ê û nê îdiayî gereka hetê mekanîzmayanê mîyannetewîy ê xoseran ra bêrê tehqîqkerdene.

‘Dosyaya Batoul Suleyman Allûşî bîya sembol’

Eşkerayî de hedîseya Batoul Suleyman Allûşî ser o bi taybetî vindertî û ame vatene ke na dosya tena trajedîyê merdimêkê nîya, labelê sembolê kulturê bêcezamendişî û nêpawitişê cinîyan o ke bi serran o dewam kena.

AHRSî dîyar kerd ke muracatan de ke înan dezgehanê NY’yî rê kerdê, tena xemgînîya xo ya derheqê meseleya Batoul Suleyman Allûşî de nêşawita, qehr û xemgînîya xo ya derheqê remnayîşê cinîyan, vîndîkerdişê bi zorî û şîdetê zayendî yê serran ê Sûrîye pêşkêşê raya pîl a mîyannetewîyan kerda.

Vengdayîşê komelan ê mîyannetewan

Komela Heqanê Merdiman a Sûrîye dîyar kerd ke ê bi hemkarîya mekanîzmayanê Neteweyanê Yewbîyayeyan, dezgehanê heqanê merdiman ê mîyannetewan, cigêrayoxanê xoseran û rêxistinanê komela sîvîle, tewrê tekoşînê raştî, edalet û hesabdayîşî dewam kenê.

Eşkerayî de nê vengdayîşî ver bi komelê mîyannetewan ameyê kerdene:

Her cinîya ke ameya remnayene, wa bêra vînayene,

Aqûbetê merdimanê ke bi zorî ameyê vindîkerdene, wa bêro eşkerakerdene,

Sucdarê şîdetê zayendî û tecawuzî wa bêrê muhakemekerdene,

Wa waştişê edaletî yê mexdûran bêrê qebulkerdene û bêcezamendişî bêro vindertene.

‘Bevengîye bêcezamendişî pîl kena’

Eşkerayî de ame vatene ke dezgehî do reyna vengê mexdûran bîyayîşî, îspatkerdişî îxlalanê heqanê merdiman û tekoşînê edaletî, platformanê mîyannetewan de dewam bikero û nê çîyî ameyê vatene: “Bêvengî bêcezamendîye pîl kena. Edalet zî bi vejîyayîşê raştîye dest pêkena.”