27ê Sibate: Proseso newe sey tîjî kewt awe

Wisar, xoza de destpêkêko newe yo. Her destpêkêko newe zî maneyê xo hêvîye ra gêno. Zimistano ke bi aşmanê xo yê serdan, pê seqem û pûkî hukmê xo ramito, nika hêdî hêdî textê xo wisarî rê ca verdano. Koyanê ma, deştanê ma, dar û berê ma, bi ameyîşê wisarî kincanê xo yê sipîyan vetî û nika amadekarîya xo ra kerdişê kincanê keskan kenê.

Rayo verên raporo kirmanckî 

Rayberê Şarê Kurdî Abdullah Ocalanî zî par sey ameyîşê wisarî prosesêko newe da destpêkerdene. Bi nê prosesî Tirkîya û Rojhelatê Mîyanênî de zaf çîyî bi hawayêko erênî bedilîyayî. Rojawan de prosesê entegrasyonî dest pêkerd û bi serkewtiş aver şino. Hema Tirkîya de Meclîsî bi xo rayo verên raporêko demokratîk amade kerd, hema pêşnûmeyêko kirmanckî rayo verên ame qebûlkerdene.

Kultur û bawerîya ma de roja 27ê Sibate roja yewbîyayîşê tîjî û awe ya. Cemre; o vêşnayîş, a weşîye û a germbîyayîşa ke asmenî ra, tîjî ra yena, verî kewte hewa. Hewa kerde germ. Nika dore ameya awe. Cemreya diyîne roja 27ê Sibate de kewena awe. Awe, herre ra verî cuye kena germ. Çunke awe çimeyê ciwîyayîşî ya, dinya bê awe nêbena. Çaxê ke cemre kewena awe, awê ke cemidîyayê, qeşayê ke xurt asayî, helîyenê. Royî şar û şar, pê coş herikîyenê. No herikîyayîş, eynî wext de herikîyayîşê weşîye û hêvîye yo. Xoza bi xo zîl dana.

Çimê hemeyê Dinya do eşkerayîye de bibo 

27ê Sibate 2026î de do Rayberê Şarê Kurdî Abdullah Ocalan eşkerayîyêk bido, do na eşkerayîye zî Tirkîya de merhaleya prosesî ya diyîne bida destpêkerdene. Çimê hemeyê Tirkîya, Rojhelatê Mîyanênî û hetta Dinya zî do Enqere de bibo û eşkerayîya Rayberê Şarê Kurdî çîyî ser o ya, do bêra temaşekerdiş.

Awe sebr a, awe quwet a. Sebra awe ra merdim zî xeylê çîyan museno. Zimistan çiqas derg bo, dinya çiqas tarî bo zî, awe binê qeşayî de bi sebr pawena û xo heriknena. Awe qet xo vîrî ra nêkena, qet vindertiş nêzana. 27ê Sibate de bi kewtişê cemre, a awa ke binê qeşayî de dard bîya, asmenî reyde, tîjî reyde reyna yewbînan vînenê. No yewbîyayîş, no germbîyayîş ma rê vano ke: "Meqefilîyê, çi beno wa bibo, hêvî her tim esta."

Hêvî her tim esta û firaz ba 

Rayberê Şarê Kurdî Abdullah Ocalanî zî sey hêvîdayîşê germbîyayîşî yê hewayî vato: "Meqefilîyê, çi beno wa bibo, hêvî her tim û her tim esta." No proses zî do bi serkewtiş biqedîyo û azadîye do heme dinya de vila biba.

Tarîyîya şewe de zî, serdîya zimistanî de zî heyat dewam keno. Hêvî, awa zerrîya merdimî ya. Bê hêvî merdim nêeşkeno biciwîyo. Seke awe dar û vaşî rê, heywanan rê can dana, hêvî zî ruhê merdimî rê can dana. Zimistan de zerrîya ma zî cemidîyena, dejî û zehmetîyî estê. Labelê çaxê ke wisar yeno, çaxê ke awe bena germ, zerrîya ma zî bena germ.

Wa na cemreya ke ewro kewta awe, pîya bi xo wa aştîye, roşnîye û rojê rindekî zî bîyara. Derd û kulê ke ma zerrîya xo de dard kerdê, wa bi awa ke germ bîya û herikîyena, bihelîyê û şorê. Cayo ke awe esta, uca de heyat esto; cayo ke heyat esto, uca de zî hêvî esta. Roja wisarî û hêvîye, şima pêroyînan rê fîraz ba.