‘Ocalanî seba teqîbkerdişê ravêrdeyî pêşnîyazê dezgeyêk kerd’

Verfeka Partîya Têduştîye û Demokrasîyî ya Şaran (DEM Partî) Ayşegul Dogan, kombîyayîşê çapemenîye yê Merkezê Pêroyî yê partîya xo de derheqê rojev û kombîyayîşê MYK’î de qisey kerd. Dogan dîyar kerd ke ganî Ravêrdeyê Aştîye û Komelê Demokratîkî lez aver şîro û da zanayene ke Abdullah Ocalanî seba teqîbkerdişê ravêrdeyî pêşnîyazê ronayîşê dezgeyêkî kerdo. Dogan, derheqê sîyasetê zereyî û amadekarîyan de bale ant xalên girîngan ser.

Çarçeweya huqûqî û "qanûnê kokî"

Dogan dîyar kerd ke ganî çarçeweya huqûqî û qanûnê derbazbîyayîşî bêrê viraştene û wina dewam kerd: "Bi nêzdîbîyayîşêko teknîk nê ravêrdeyî de îhtîyacîyî caardene. Birêz Ocalan na çarçewe sey 'qanûnê hucreyê kokî' pênase keno. No qanûn ganî yew qanûno wina bo ke bingeyê probleman çareser bikero. Heke heta nika gamî ameyênê eştene û raporê komîsyonî yê Meclîsî ameyênê caardene, nika ma nê probleman nêqisey kerdêne. Sere ra raştê enfeksîyonbîyayîşî ameyebî vatene, seba ke nê xeterîyî nêqewimîyê, ma vanê 'huqûq, huqûq, huqûq'."

Pêşnîyazê neweyî û têkilîya rojnamegeran

Derheqê pêvînayîşê Heyetê Îmraliyî û Ocalanî de Dogan da zanayene ke Rayberê Şarê Kurdî Abdullah Ocalanî wazeno rojnamegerê ku piştgirîya aştîye kenê, înan reyde pêvînayîş bikero û wina domna: "Ma pêşnîyazê partîya xo û yê Ocalanî resnayî. Heta ke Meclîs nêkewo betlane, ma wazenê pê yew konsensusî qanûnî bivejîyê. No tenya qanûnê bêçekkerdişî nîyo; ganî heqên aborî û komelkîyan zî bigêro xo mîyan. Wa meclîs mesuldarîya xo bica bîyaro û partîyê bînî zî wayîrê mesuldarîya xo bivejîyê. Ma weçînayîşî rê amade yê, la qet yew hesabê weçînayîşî an zî dîzaynê partîyêke nêkewo verê nê prosesê muhîmî. Ganî qet yew îhtîmal prosesî nêdo peyser. Tirkîya verê firsendêkê tarîxî de ya. Heto bîn ra partîya ma bi konferansan xo amade kena ke şêro kongreya pîle. Xebatê ma yê komîsyonan dest pêkerdê û ma do bi konferansêkê girdî şêrê kongre."