Abdullah Ocalanî ra mesajê KNK’î: "Vîna hempare û yewîya demokratîke şert a"

Kongreya Neteweyîya Kurdistanî (KNK) kombîyayîşê xo yê 24. yê pêroyîyî kerd. Rayberê Şarê Kurdî Abdullah Ocalanî zî bi yew mesaj tewrê kombîyayîşî bî. Mesajê xo de Abdullah Ocalanî paştî daye xebatanê KNK’î û îfade kerd ke Rojhelatê Mîyanênî de bê vîn û îradeyê Kurdan tu dîzayn nêbeno. Reyna Ocalanî seba çareserîya problemê neteweyîyan nîşanê bi sîyaset, dîyalog û huqûqî kerd û yewîya demokratîke sey wezîfeyêko tarîxî yê şarê kurdî pênase kerd.

Seba Kombîyayîşê Pêroyîyî yê KNK’î mesajê Rayberê Şarê Kurdî Abdullah Ocalanî wina yo:

“Welatperwerê ercîyayeyî, temsîlkarê qedirberzî, meymanê rûmetênî;

Verê her çîyî ez Kombîyayîşê 24. yê Pêroyîyî yê Kongreya Neteweyîya Kurdistanî (KNK) bi hîsanê xo yê tewr zerrîyan ra selam kena û na pêvînayîşa şima ya biqîymete û 27. serrgêra KNK’î bimbarek kena. Awankerdiş û ronayîşê Kongreya Neteweyîya Kurdistanî (KNK) de, mi zî hetê xo ra kede daye û paştî daye cî. Zindan de biba zî, goreyê derfetan, mi xebatê şima teqîb kerdî û wext bi wext zî pêşnîyazê xo erşawitî şima. Her nîqaşo ke sero ameyoxîye, yewîya neteweyîye, heqê demokratîkî û vîna hempare ya şarê kurdî yeno kerdiş, meşîyayîşê tarîxî yê şarê ma de wayîrê cayêkê girîngî yo.

Şarê kurdî ewro tarîxê xo de qonaxêkê zaf girîngî ra derbaz beno. Kurdê ke bi se serran rîbirîyê polîtîkayanê înkarî, çinkerdişî, parçekerdişî û bêstatuyîye mendî, bi bedelanê pîlan vîna xo ya azadîye pawite, qabîlîyetê xo yê sîyasîyî aver berdî û bîyî dînamîkanê komelkîyan ê tewr girîngan ê Rojhelatê Mîyanênî ra yew. Dima ra nêbeno ke merdim behsê hemkêşeyêka Rojhelatê Mîyanênî bikero ke tede kurdî nêrê hesibnayîş û vîna înan çin bêro qebulkerdiş.

Na raştîye kurdan rê berpirsîyarîyê neweyî zî ana. Verê her çîyî, averberdişê kulturê dîyalogî, nîqaş û xebata hempare yê mîyanê kurdan de yew wezîfeyo tarîxî yo. Yewîya neteweyîya kurdan, armancêk nîyo ke tena yew têgêrayîş, partîye yan zî hetêkê sîyasîyî bi sereyê xo bîyaro ca. Na yewîye eşkena bi keda hempare ya heme hêzanê sîyasîyan, roşnvîran, cinîyan, ciwanan û dînamîkanê komelkîyan ê kurdan awan biba.

Yewîya demokratîke ya mîyanê kurdan, nêqebulkerdişê cîyayîyan nîya; tam eksê ci, resayîşê cîyayîyan o ke serê zemînêkê demokratîkî de yo. Armanc yewvengîye nîya, armanc o yo ke merdim babetanê neteweyîyan ê hemparan de vînêka hempare nîşan bido. Averberdişê tewirêkê hemparî yê babetanê serekeyan de ke menfîetanê şarê ma de yê, desturnêdayîşê şuxulnayîşê kurdan yê vera yewbînan û pawitişê destkewteyanê neteweyîyan bi hişmendîyêka hempare, ganî mîyanê prensîbanê bingeyîyan ê yewîye de bêrê.

Naye ra, averberdişê ravêrdeyêkê hîrayî yê dîyalog û muzakereyî yê mîyanê kurdan de wayîrê girîngîyêka pîle yo. Rayîrê derbazkerdişê xeyidîyayîş û abirîyayîşanê verênan şer nîyo; qiseykerdiş, nîqaşkerdiş û dîyayîşê çareserîyanê hemparan o. Fikrê kongreyêka neteweyîya demokratîke zî ganî sey îfadeyê dezgeyî yê na îhtîyacîye bêro dîyayîş.

Pîya bi naye zî, ameyoxîya şarê kurdî tena bi yewîya neteweyîye giredayeyê nîya, eynî wext de bi ferasetê komela demokratîke ra zî giredayî ya. Vînayîşê komela demokratîke esas gêno ke problemî nê bi şer û şîdetî, la bi sîyaset, huqûq û nîqaşê demokratîkî çareser bibê. No vînayîş têdûştîya şaran, demokrasîyê herêmî, rêxistinbîyayîşê azadî û cuyena hempare paweno.

Weçînayîşo tarîxî yê verê şarê kurdî tena nîqaşêkê statuyî nîyo. Babeta serekeye a ya ke do cuyêka komelkîya senêne bêra awankerdiş. Ferasetê komela demokratîke, azadîya şarê ma bi azadîya şaranê bînan dir ercnena; armancê ci şer nîyo cuyena hempare ya, parçekerdiş nîyo yewîya demokratîk a.

Çîyê ke ewro îhtîyacîya ma pê esta; ruhê yewîya neteweyîya xurte ya mîyanê kurdan de, paştdayîşo demokratîk o ke bi şaranê Rojhelatê Mîyanênî reyde yo û vînayîşêko hempar ê ameyoxî yo ke serê bingeyê azadîye de bêro awankerdiş. Naye ra, pîlkerdişê gêrayîşê kurdan yê seba yewîya demokratîke, pawitişê destkewteyanê neteweyîyan û xurtkerdişê ercanê komela demokratîke berpirsîyarîya ma pêroyînan a hempare ya.

Bi nê hîs û fikran ez kombîyayîşê şima reyna selam kena û hêvî kena ke nîqaş û netîceyê ke do bivejîyê meydan, xizmetê yewîye, azadîye û ameyoxîya demokratîke ya şarê ma bikerê.

Ez serkewtiş wazena û heme beşdaran bi rûmet selam kena.

Abdullah Ocalan

Girawa Îmraliyî, 01.06.2026”