Aqlê dewlete û prosesê 27ê Sibate

Prosesê 27ê Sibate ke seba ronayîşê "Tirkîyaya newîye" bi hêvîyêka pîle dest pêkerdbî, bi serrgêra xo ya yewine de ancîya kewta rojeva ma û ganî ma bi hîrayî ser o vinderî. Sereyê vengdayîşê tarîxî yê 27ê Sibate yê Rayberê Şarê Kurdî Abdullah Ocalanî ra tam yew serre vîyart. Nê vengdayîşî de bi nameyê 'Aştîye û Komelê Demokratîkî' ameybî vatene ke "Hêzbîyayîşê PKK’yo ke tarîxê komarî de têgêrayîşê tewr xurt ê xoverdayîşî yo, sedemê ci qefilnayîşê kanalê sîyasetê demokratîkî yo." Dima ra ameybî vatene: "Hurmetdayîşê nasnameyan û xo îfadekerdişê komelî, tena bi estbîyayîşê qada sîyasetê demokratîkî mumkin o."

Xarîteyê prosesi bi

Eynî vengdayîş de Rayberê Şarê Kurdî Abdullah Ocalan coka vatbî: "Hembarîya demokratîke metodê ma yo bingehîn o" û destnîşan kerdbî ke ganî ziwanê nê demî zî goreyê raştîye bêro afernayene. Peynîya vengdayîşî de zî wina vatbî: "Bêşik o ke pratîk de veradayîşê çekan û fesixkerdîşê PKK’yî, şinasnayîşê huqûqî û qebûlkerdîşê sîyasetê demokratîkî wazeno." Na yewe xarîteyê prosesî bîye.

Rojê ke ma nêzdîyê serrgêra nê vengdayîşî benê, 18ê Sibate de Heyetê Îmraliyî derheqê pêvînayîşê Rayberê Şarê Kurdî Abdullah Ocalanî de yew eşkerayîye daye. Aseno ke o hema zî lazimîyê prosesî dibare keno. Ma bîyê şahid ke nê wextî de hetê kurdan wezîfeyê xo ardî ca, la qanadê dewlete hema zî tu gamêka pratîke nêeşta û cewab nêdayo.

Gelo! Biresê mercê sîyasetê demokratîkî

Ewro ma vînenê ke raporê Meclîsî amade yo. Raporo ke DEM Partîye zî şerhê xo dabi, tede hema zî rojev 'teror' o û tasfîyekerdîşê ci yo. Rayberê Şarê Kurdî Abdullah Ocalanî verê cû nê tewirî rexne keno û vano: "Sîyaseto ke bi mantîqê tasfîyekerdîşê terorî nêzde beno, beno bêçareserîye." Heto bîn ra, goreyê nê raporî welat de hema zî 'Persê kurdî' çin o û nêno qisekerdene. Raporê ezberanê verênan tena bala xo dayo veradayîşê çekan. La 11ê Temmuze de PKK bi eşkerîyêka resmîye vatbî ke êdî çekî veradanê. Persê bingehîn ê nika o yo ke; kesê ke çekî veradayê, gelo! do biresê mercê sîyasetê demokratîkî?

Rayberê Şarê Kurdî Abdullah Ocalanî vano: "Ma do sîyaset bikerê. Çek û şîdet ameyê fekveradayêne." La gelo şertê ci do bêrê afernayene? Bêşik o ke raporê Komîsyonî nê îhtîyacîyan rê cewab nêdano û proses apey bena. Coka KCK’yî zî ziwanê nê raporî xurtî rexne kerdo.

Bêqanûn nêbena

Peynîye de; îradeyê çareserîye yê kurdan eşkera meydan de yo. La gelo dewlete dima ra yew serre do nameyê persî raşt bino, yan zî do bi retorîkên verênan sîyasetê roj-xelîsnayîşî bidomno? Raşt a ke pers giran o. Bê bedilnayîşêko xurt ê zîhnîyetî gamêke zî nêna eştene. Rayberê Şarê Kurdî Abdullah Ocalan seba naye hîşyarî kena: "Înkar-nêkerdişê kurdan, nêyeno manaya ronayîşê mîmarî. Mîmarî bê qanûn nêbena."

Perso ke ma yew serre yo cewabê ci geyrenê eşkera yo; gelo! aqlê dewleta tirkî do kanalê sîyasetê demokratîkî akero, seba raştîya kurdan gamêke bierzîyo, yan zî do xapênayîş de israr bikero? Gelo! dewlete do bi aqlêko konjonkturel nêzdîya persî bo, yan zî do bi aqlêko stratejîk têbigêrayo? Cewabê nê persan do ameyoxê prosesî tayîn bikero.