Banga lezgîn ji bo berdana girtiyên nexweş Hatîce Yildiz û Yilmaz Çerçel
Li Stenbol û Enqereyê parêzvanên mafên mirovan ji bo girtiyên nexweş Hatîce Yildiz a 77 salî û Yilmaz Çerçel ê nexweşê şîzofreniyê çalakiyên xwe yên heftane li dar xistin. di daxuyaniyan de hat xwestin ku girtiyên nexweş demildest bên berdan û dawî li biryarên kêfî yên lijneya îdare û çavdêriyê bê anîn
Parêzvanên mafên mirovan li Enqere û Stenbolê di çarçoveya çalakiyên xwe yên heftane de, careke din bal kişandin ser rewşa giran a girtiyên nexweş. Di çalakiyan de rewşa Hatîce Yildiz û Yilmaz Çerçel hate ziman û ji bo gihîştina mafê wan ê dermankirinê banga lezgîn hate kirin.
Stenbol: Çalakiya rûniştina F ji bo Hatîce Yildiz
Komîsyona Girtîgehan a Şaxa Komeleya Mafên Mirovan (ÎHD) a Stenbolê, çalakiya xwe ya "Rûniştina F" di hefteya 740'emîn de li ber avahiya komeleyê berdewam kir. Di çalakiya vê hefteyê de bal kişandin ser rewşa Hatîce Yildiz a 77 salî ku niha li Girtîgeha Jinan a Girtî ya Bakirkoyê tê girtin.
Endama ÎHDê Vîldan Kiran daxuyanî xwend û ev agahî parve kirin:
“Hatîce Yildiz bi nexweşiyên giran ên wekî demans, tansiyona bilind, helandina hestiyan, fitiq û pirsgirêkên dîtinê re têdikoşe. Tevî van nexweşiyên giran, Saziya Tiba Edlî (ATK) rapora "dikare di girtîgehê de bimîne" daye wê. Yildiz di 22'yê Adara 2024'an de hatiye girtin û 4 sal û 2 meh ceza lê hatiye birîn.”
Kiran destnîşan kir ku malbata Yildiz ji jiyana wê bi fikar e û xwest ku ew demildest bê berdan. Çalakî bi dirûşmeyên "Dermankirin maf e, nayê astengkirin" û "Tecrîd dikuje, hevgirtin jiyan e" bi dawî bû.
Enqere: daxwaza azadiyê ji bo Yilmaz Çerçel
Însiyatîfa ji Girtiyên Nexweş re Azadî jî li Enqereyê, di hefteya 612'emîn a çalakiya xwe de li Kolana Sakaryayê daxuyanî da. Rêveberê Şaxa ÎHD'ê ya Enqereyê Atîlla Dîrîm, rewşa Yilmaz Çerçel ê ku li Girtîgeha Tîpa H ya Eskîşehîrê tê girtin, vegot.
Dîrîm di axaftina xwe de bal kişand ser van xalên girîng:
“Yilmaz Çerçel di sala 1993'yan de bi birîndarî hatiye girtin û nexweşê şîzofreniya giran e. Milê wî yê çepê kar nake, nexweşiya diranan pê re heye û bêyî alîkariya kesên din nikare jiyana xwe bidomîne. Tevî rewşa wî ya giran, Lijneya Îdare û Çavdêriyê di 21'ê Gulana 2026'an de bi hincetên wekî "ji rêxistinê qut nebûye" û "bi girtiyên rêxistinkirî re dimîne" berdana wî taloq kiriye.”
Dîrîm anî ziman ku girtina nexweşekî şîzofreniyê li girtîgehê binpêkirina mafên mirovan e û ev sepan wekî "cezakirina nexweşên giran" pênase kir. Daxuyanî bi dirûşmeyên banga dawîkirina tecrîdê û azadiya girtiyên nexweş bi dawî bû.
