Dafa mereyî û dinya
Ey dewletê dinya û welatijê înan, weş bizanê ke belateyêk meydan de bêro dardakerdiş, waxtêko kilm de do boy bidero heme dormeyê xo û dinya bibo cayêko boyin. No semed ra, lazim o, hewna belateyê DAIŞ’î boy nêdaya şima, ke şima ey hal bikerê.
Ehmedê Bira
Kurdî, bi seserran o ke xo dînan ra pawenê, la heta na game, her tim heme dînan ra zirar dîyo û do nika ra pey zî zirar bivînê. Serdestê Rojhilatê Mîyanênî, dînan û mezheban seba menfeetê xo şuxûlnenê. No eşkera yo ke nê rojan de, na rewşe; Rojava de û heme welatê kurdan de ana çiman ver. Kurdan, semedo ke dewletanê serdestan ra zirar dîyo, nêwazenê ke dewletêka serbixo awan bikerê. Kurdî; wazenê ke pergalêko bêdewlete de biciwîyê. Wa heme dinya bizano ke, edalet bêdewletî de yo. Sîstemê/pergalê Dewlete; bi her hewa merdiman sero yew zilmo pîl keno.
Ez bêra meseleya dafa mereyî ser. Rojêke keyêke de mere vîneno ke dafeke ameya ronayiş û mere teşxele keno û heme heywananê keyeyî reyra muzakere keno. Şono kerg û dîkî het û vano ke; şima zanê ke tayê kesan dafe ronaya, bêrê ma pîya na dafe wereznê. Dîk û kerg vanê ke ma rê lazim nîyo, daf kabê to ronîyaya. Ti waxto ke şêrê penîrî borî, do ti bêrê tepiştiş. Mere ewnîyeno înan ra xêr nîyno, kuweno rayîr û şono manga het û vano ke; "Waya manga, keye de dafe ronaya, ma na dafe senî hal bikerê.” Manga ey ra vana, problemêkê min û dafe çîn o, se beno wa bibo. Mere pey goşê xo wirneno û şono mêşna het la eynî cewabî geno, vana ke; "Ez yew mêşna ya kar û gureyê mi bi dafe çîno...”
Roj ravêreno mar kuweno dafe û cinîya wayîrê keyî kena ke dafe bibo berzo teber, la maro ke dafe de yo, cinîyî tepêşeno û cinî nêweş kewena. Wayîrê keyeyî semedo ke cinîya ey weş bibo, dîk û kerge serebirneno. Roja bîn mêmanî şonê û yenê, ewnîyeno ke cinîya ey weş nêbena, na ray mêşna zî serebirneno û dano mêmanan ver. Cinîya ey weş nêbena. Hewna kuna halê merdişî û rehmet kena. Semedê yadkerdişê cinîya xoi werd bido mêmanan manga xo zî serebirneno...
Erê wendoxê erjayeyî, mesela çi ca ra şîy çi ca... eke heywanan vateyê mereyî bikerdinê û ardimê mereyî bikerdinê û dafe biwereznaynê, sereyê înan nêbirîyaynê. La çîyo ecêp zî yê ke dafe vînaya mere bi, o tena weş mendo û cuya xo dewam kerda...
Mesela ma kurdan zî na ya. Ma Selehadînê Eyûbî ra yo ke zanê, daf û dolabê dewletan nêqedîyenê. No semed ra yo ke, kurdî dewleteran ra zaf zirar dîyo, nêwazenê ke dewletêke awan bikerê.
Ey dewletê dinya û welatijê înan, weş bizanê ke belateyêk meydan de bêro dardakerdiş, waxtêko kilm de do boy bidero heme dormeyê xo û dinya bibo cayêko boyin. No semed ra, lazim o, hewna belateyê DAIŞ’î boy nêdaya şima, ke şima ey hal bikerê. Şima hîkaye wend û şima vîna ke mere tena xelisyayo. Yanî dafa ke semedê mereyî amebi ronayiş, mere nêdekewto na dafe û xelisîyayo, la hemeyê înan yo ke vato ma rê lazim nîyo, sereyê xo ra bîy û ameyê birnayene...
Ey dewletê Dinya, şima bizanê ke DAIŞ do nêeşkero sereyê kurdan bi temam bibirno, la do sereyê şima kok ra bibirno û do şima orte ra hewano. Şima Şerê Kobanî de vîna/dîy, na rewşe dîy. Eke şima daf û belayan hewanênê, yê ke bikewê dafe do şima bê...
Ey dewletê Dinya, şima weş bizanê ke, roj rojê merdiş û nêmerdişê kurdan o. Weş bizanê ke kurdî, bi seserran o ke nêmerdê û do hertim payan ser o bimanê. Weş bizanê ke hesabo şaş Amed ra ageyreno.
Ey dewletî, heta ke serebirnayîş nêresayo şima, polîtîkaya xo çiman ver ra bivernê. Zey kurdêk, ez şima hişyar kena. Çimkî kurdî, nêwanê ke dindanê kesêkî zî bidejo. Haa eke kam ke pay damara kurdan ro, kurdî tu kesêkî ef nêkerdê. Wa na heme kes bizano.
