Gurlek: Wextêko kilm de seba ravêrdeyî do qanûnêk bêro Meclîs

Wezîrê Edaletî Akın Gürlek, saetanê serê sibayî de ame Rîze. Gurlekî Wîlayetê Rîze de mensubanê çapemenîye rê eşkerayîyî dayî.

Gurlekî ke qala raverdeyê meselaya kurdan o ke dewam keno kerd, derheqê vurnayîşanê qanûnî yê rojdemî de wina vat: “Rayîrê ‘Tirkîyeya Bêterore’ de gamê girîngî ameyî eştene û înşallah wextêko kilm de do yew xebata qanûnî bêra Meclîs. Ewro binê banê Meclîsê Pîlî yê Neteweyî yê Tirkîya de zî, partîyê ma yê sîyasîyî yê ke îradeyê mîllîyî mojnayê ra tewr zafê înan, binê serekîya Serekê Meclîsê ma Birêz Numan Kurtulmuşî de wextê xo xebate rê xerc kenê. Nika heta qonaxanê peyênan ê projeyê dewlete yê seserre, ma ameyî yew cêrabîyayîşê rayîrî yo girîng o ke bêqeza û bêbela yo. Projeyê ‘Tirkîyeya Bêterore’ ke seba Seserra Tirkîya qonaxan ra tewr girîngan ra yew o, inşallah bi qanûnî zî do bêro tacîdarkerdene. Wextêko zaf kilm de zî inşallah no qanûn do bikewo merîyet.”

Paketê Darazî yo 12ine

Gurlekî derheqê Paketê Darazî yo 12ine yo ke rojdem de yo de zî qisey kerd. Gurlekî nê çîyî ardî ziwan: “Bi taybetî dosyeyê faîlî-meçhulî, dosyeyê nêçareserkerdeyî yê demdergî, formê têkoşînê vera rêxistinanê sûcî, awanîyê çeteyan ê neslê neweyî, qumaro sanal û rêxistinê behîsî, torbacîyan ra heta baronan rêxistinê maddeyê huşkerdoxî, ma do vera her tewir awanîyanê ferdî û rêxistinîyî yê ke asayîş û huzur eştê tehlûke, heta peyên têkoşîn bikerê. Kes nêeşkeno vejîyo teberê huqûqî. Êyê ke cezayan kêmî vînenê seba înan zî, zey ke şima zî zanê Paketê Darazî yo 12ine nika Meclîs de qonaxê vurnayîşî de yo. Nê babetî de zî ma Paketê Darazî yo 12ine de, bi taybetî tayê sûcan de qandê zêdekerdişê cezayan tayê vurnayîşî kerdî.”