Îran de yewîyeya ‘Jin, Jiyan, Azadî’
Ma eşkenê vajê ke xelasa şarê kurdî yê Îranî û şarê ma yê bînî, tenya bi yewîye bena. Partîyê kurdan ganî nê qerarê xo yê yewbîyayîşî rê wayîr vejîyê û nê qerarî hîna bikerê xurt. Yewbîyayîşo ke bi ruhê "Jin, Jiyan, Azadî " dest pêkerdo, eke dewam bikero, eşkeno pergalê dîktatorîya Îranî birijno û azadîye bîyaro
Rojhelatê Kurdîstanî (Kurdistanê Îranî) de, bi serran o ke şarê kurdî binê zulum, zordarî û îşxalê rejîmê Îranî de ciwîyeno. Rejîmê Îranî, çi wextê Şahî de çi zî wextê Komara Îslamî de, tu wext heq û huqûqê kurdan qebul nêkerd. Sîyaseta înan hertim asîmîlasyon, înkar, îdam û qirkerdiş bi. Ciwanê kurdan her roje bi bahaneyanê cîya-cîyayan yenê îdamkerdiş. Ziman, kultur û estbîyayîşê kurdan ameyo qedexekerdiş. Labelê, şarê kurdî nê zulumî ver de qetî sereyê xo nêard war û her tim seba heqanê xo yê neteweyîyan têkoşîn da.
Tarixê qirkerdiş û xoverdayîşî
Tarixê kurdanê Rojhelatî, bi xoverdayîş û qehremanîye ameyo nuştiş, la eynî wext de bi qirkerdiş û îxanetî zî ameyo naskerdiş. Komara Mehabadî ra heta ewro, rayberê kurdan sey Qazî Mihemed, Ebdurehman Qasimlo û Sadiq Şerefkendî hetê rejîmî ra ameyê qetilkerdiş. Rejîmî bi nê qetîlkerdişan waşt ke têgêrayîşê kurdan bêsere biverado.
Ewro Rojhelat de bi hezaran ciwanê kurdî seba debara xo mecbûr manenê ke bibê kolber. Kolberî, sînoran de binê tehlukeyê mergî de kar kenê û her roje bi desan kolberî hetê lejkeranê Îranî ra yenê kiştiş. Na rewşe zî nîşan dana ke rejîmê Îranî tenya sîyasî nê, hetê aborîye ra zî kurdan qir keno û înan mehkumê xizanîye keno. Çareserîya nê derdan pêro, girêdayeyê yewîya kurdan a.
Xirabîya parçebîyayîşî û rewşa partîyan
Tarixê têkoşînê Rojhelatî de yew kêmîya zaf girde est bî: parçebîyayîşê partîyanê kurdan. Partîyê sîyasîyî yê kurdan (zey PDK-Î, Komel, PJAK û ê bînî) wexto ke yewbîyayîşêk nêvirazê, hêzê rejîmî zêde beno. Wexto ke partîyî yewbînan dir nêkewtê têkiliye û yewbînan reyde nêxebetîyayê, rejîmê Îranî nê nêbîyayîşê yewîye ra zaf asan îstîfade kerd. Rejîmî bi polîtîkayanê xo yê "parçe bike û îdare bike" waşt ke têgêrayîşê kurdan bido vindertiş. Wexto ke kurdî mîyanê xo de bîyê dişmen, rejîmî kîfşê xo kerd.
Gamê yewbîyayîşî û hêvîya şarî
La nika, bi taybetî dima ra serewedaritişê "Jin, Jiyan, Azadî" (Jina Emînî ra dima), partîyanê kurdan dî ke bê yewîye serkewtiş nêbeno. Serranê peyênan de partîyanê kurdan ê Îranî qerarê yewbîyayîşî yan zî hemkarîye girewt. Merkezê Yewîyeya Partîyanê Kurdistana Îranî awan bi. Na yew gamêko zaf muhîm o. Çîke wexto ke partîyî sîyasetêkê hembarî ramenê, hem bawerîya şarî zêde bena hem zî dîplomasîya mîyanneteweyî de vengê kurdan hîna xurt vejîyeno. Pêameyîşê partîyan, hêvîya şarê Rojhelatî kerd pîle. Şar wazeno ke partîyî berjewendîyanê xo yê teng û partîzanîye biveradê û seba xelasa neteweyîye pîya bixebetîyê.
Muhîmîya yewîyeya neteweyîye
Tenya Rojhelat de nê, çar parçeyanê Kurdîstanî de zî yewîya kurdan şert a. Eke kurdî mîyanê xo de yew nêbê, pergalê serdestî eşkenê asanîye ra kurdan bişiknê. Yewîya neteweyîye, seba kurdan tenya yew tercîh nîyo, şertê estbîyayîşî yo. Wexto ke kurdî bibê yew, tu hêzêk nêeşkeno îradeyê înan bişikno. Yewîya partîyan, seba dîplomasîya mîyanneteweyî zî avzel a. Dinya û dewletê serdestî, wexto ke kurdan sey yew hêzo hempar bivînê, mecbûr manenê ke kurdan sey muhatab qebul bikerê.
Ma eşkenê vajê ke xelasa şarê kurdî yê Îranî û şarê ma yê bînî, tenya bi yewîye bena. Partîyê kurdan ganî nê qerarê xo yê yewbîyayîşî rê wayîr vejîyê û nê qerarî hîna bikerê xurt. Yewbîyayîşo ke bi ruhê "Jin, Jiyan, Azadî" dest pêkerdo, eke dewam bikero, eşkeno pergalê dîktatorîya Îranî birijno û azadîye bîyaro.
