Îraq de krîzê weçînayîşê serekkomarî dewam keno
Parlamentoyê Îraqî qerar girewt ke seba weçînayîşê serekkomarê neweyî 11ê Nîsane roja Şemeyî yew roniştişo xususî biko. La mîyanê komanê sîyasîyan de hem derheqê namzedanê serekkomarî hem zî ê serekwezîrî de nêpêkerdiş dewam keno
Serekkomarîya Îraqî, dima ke Saddam Huseyîn ame war, 2003 ra nata kurdan de ya. Dima Saddam Huseyînî Serekkomaro yewin ê Îraqî, serekê Yewîya Nîştimanîya Kurdîstanî (YNK) Celal Talabanî bi û heta nika zî no qoltux hetê nameyanê YNK’jan ra ame temsîlkerdiş. La dewrê neweyî de mîyanê YNK û Partîya Demokrata Kurdîstanî (PDK) ke serekê ci Mesud Barzanî yo de reqabet esto û PDK’yî na rey namzedê xo vet. Reqabetê mîyanê kurdan, bîyo sebeb ke weçînayîşê serekkomarîyo ke ganî aşma Çeleyî de parlamentoyê Îraqî de biqedîyayêne, talûq bibo.
Rayberanê Çarçeweya Koordînasyonê Şîîyan ê ke grûbanê Şîîyan ê Îraqîyan temsîl kenê, binê serekîya serekwezîrê nika Sudanî de, serê aşma Sibate de Hewlêr û Silêmanî de serekê PDK û YNK’yî zîyaret kerdî û waşt ke ê pê bîyarê. La hema yew netîce nêvejîyaya.
Weçînayîşê serekkomarî ke nêbîyo, nêverdeno ke hukmato newe Îraq de bêro awankerdiş û karî keno peyser. Namzedê Çarçeweya Koordînasyonê Şîîjan Nurî El Malikî yo. La mojnayîşê namzedîya Malikîyî, rayîr akerd yew krîzo newe. DYA, Malikîyî zey hetgirê Îranî vîneno û eşkera vera namzedîya ey vejîyeno.
Seba weçînayîşê serekkomarî siba roniştiş virazîyeno
Serekîya Parlamentoyê Îraqî, programê roniştişê xususîyo ke bi rojdemê weçînayîşê serekkomarî yeno arêdayîş, rayaumûmîye dir pare kerd. Eşkerakerdişo fermîyo ke vizêr ame kerdiş de, ame îlan kerdiş ke parlamento do 11ê Nîsane roja Şemeyî saete 11:00 de teyna bi yew maddeya rojdemî bêro têhet.
Roniştişê parlamento de ke seba meqamê serekkomarî pêro pîya 19 namzedî do pêro bidê, di nameyî vejîyenê vernî: Namzedê Partîya Demokrata Kurdîstanî (PDK) Fuad Huseyîn û namzedê Yewîya Nîştimanîya Kurdîstanî (YNK) Nizar Amidî. La çend aşmî yo ke mîyanê PDK û YNK’yî de sero namzedêkê muşterekî pêkerdiş nêameyo viraştiş, no zî prosesê weçînayîşî keno nêeşkera.
Etruşîyê PDK’yî da zanayîş ke ê tarîxo ke dîyayo qebul nêkenê
Ferhad Etruşîyo ke kontenjanê PDK’yî ra wezîfeyê Hetkarîya Serekîya Dîyîne yê Parlamentoyê Îraqî de yo, derheqê roniştişo ke seba roja Şemeyî dîyayo de yew eşkerakerdişo nuştekî kerd. Etruşîyî eşkera kerd ke bi sebebê "pêkerdişo neteweyî û sîyasî nêvirazîyayo", ê qebul nêkenê ke seba weçînayîşê serekkomarî tarîxê 11ê Nîsane bêro kifşkerdiş.
