Karasû: Eke gamî nêerzîyê, entegrasyono demokratîk bêmana beno
Endamê Konseya Rayberdişî ya KCKyî Mûstafa Karasûyî dîyar ke Prosesê Haştî û Komelê Demokratîkî de êdî ganî gamê pratîkî bêrê eştene û vat: "Hetê îqtîdarê AKPyî ra eke game nerê eştene, entegrasyono demokratîk bêmana beno."
Endamê Konseya Rayberdişî ya KCKyî Mûstafa Karasûyî beşdarê programê Medya Haber TVyî yo taybet bî û derheqê averşîyayîşanê rojeve de erjnayîşê muhîmî kerdî. Karasuyî qiseykerdişê xo bi yadkerdişê şehîdanê aşma gulane dest pêkerd û îfade kerd ke şehîdan no têkoşîn heta ewro ardo.
Karasûyî vat ke proses seba tepşê dewleta Tirkîya yo neyînî resayo noqteya xetimîyayîşî. Karasuyî bi taybetî vera munaqaşeyanê "tesbîtkerdişê verdayîşê çekan" reaksîyon da û vat: "Ma nika koyan ra yê. E, ma nika çekdar ê. Ma do xo bipawê. Ma şerê vera Tirkîya qedêna la beno hêrişê bînî bibê. Yew dewlete prosesêko winayên de gere firsend nêdo nê tewir demagojîyan. Wa çekan verdê û tesbît û teyît bikerê. Do se bikerê? Manaya ney na ya: Ma nêkenê, ma çin ê, ma nêwazenê nê prosesî aver berê."
Karasûyî dîyar kerd ke tedaya îqtîdarî ya vera muxalefetî, bi taybetî tewrê vera CHPyî qismêkê komelî nêrehet keno. Karasûyî vat ke nê tedayî zaf giran ê û qebul nêbenê.
Karasûyî Rojawan de vera hêrişanê HTŞyî yê vera kurdkî zî reaksîyon da û veng da şarê kurdan ke vera nê hêrişan bi xo wirzîyo û wayîrê ziwanê xo yê dayîke vejîyo.
Karasûyî vat: "Wexto ke entegrasyonê demokratîkî de gamî nêrê eştene, bêmana beno. Hetê HTŞyî ra televîzyon de vat 'Komara Erebe'. Komara Erebe beno? Uca kurdî, turkmenî, durzîyî zî est ê. No mezgê qirkerdişî yo. Ziwanê yew şarî nêhesibnê! Uca bi sehezaran gedeyî bi ziwanê dayîke 15 serrî wend. Do se bikerê?"
Karasûyî vat ke şarê kurdan ganî vera hêrişanê vera ziwanê xo, kulturê xo û nasnameyê xo wirzîyo payan ser. Karasûyî vat: "Eke cinî, gede, pîr heme wa wirzîyê payan ser. Do se bikerê?"
Derheqê qetlê Gulîstane Doku de Karasûyî vat: "No seba kurdan tepşê dewlet o ke vera cinîyan keno. Polîs, çawuşê pisporî, bûrokratê ke yenê Kurdîstan, Kurdîstan de wazenê her tewir hakaretan bikerê. Kênekê kurdan û ciwananê kurdan sey objeyê tatmînê seksî vînenê. No bêexlaqî yo! Ganî komel destûr nêdo nînan. Ganî kurdî bi rêxistinkerdişê cinîyan, ciwanan û komelî destûr nêdê ke nê wina bikerê."
