Ma do ‘Yewîya stratejîke’ azad bikera
Dewletê ke Kurdîstan îşxal kerdo, êdî hêzê xo yê verênî vîndî kerdê, bîyê zeîf. Yew bi yew kewtê rewşa rijyayîşî yê. Nê demî de, eke serkêşîya partîyanê kurdan de şarê kurdî semedê yewîye û azadîye bi mesulîyet têbigêro, serkewtiş misoger o.
Lîzşêr Amed
Wexto ke merdim bala xo dano hedîseyanê Rojhelato Mîyanên û Kurdîstanî, hem dejê serranê verênan hem zî xeyalê yewbîyayîşê çar parçeyanê Kurdîstanî zerrîya merdimi lerzneno. Şarê kurdî do nê prosesê newebîyayîşê Rojhelato Mîyanên de senî yew helwêst bimojno? Herême de rejîm û dewletê kehenî rijyenê, yê neweyî yenê ronayîş. Gelo stratejîya şarê kurdî do senî bo? Şarê kurdî do bişîyo destkewteyanê xo hîra bikero yan nê? Persanê nê persan ciwîyayîşî yê.
Stratejî û taktîkê afernayoxî
Tarîx her tim firsendan nêdano, la wexto ke dano zî, ê ke nê firsendan ra aqilane îstîfade nêkenê, înan ef nêkeno. Ganî rayberê şarê kurdî ruhê wextî baş biwanê. Eke stratejî û taktîkê afernayoxî bêrê ronayîş, bêşik ma do biserkewê. Se serrî yo ke şarê kurdî binê zencîranê çinkerdişî de yo. Dewletanê neteweyî waşt ke kurdan çin bikerê, labelê şarê ma vera nê rejîmanê faşîstan de xo ver da û estbîyayîşê xo pawit.
Ewro statuko û dewletê faşîsti rijyenê. Labelê ma dî ke wexto ke rejîmê faşîsti rijyenê, ca de demokrasî nîno. Îran de Şah şi, 'Şoreşa Îslamî' ameye ke reyna xirab bi. Iraq û Sûrîye de Baas rijya, la demokrasî nêame, tena şîdet û dîktatorî zêde bi. Ewro Şam de, hetkarîya Dewleta Tirkan a faşîste reyra, cihadperestê sey HTŞ hukmê xo îlan kenê û wazenê sey Baasî îradeyê kurdan çin bihesibnê.
Sey Enver û Telat Paşayan
Dewleta Tirkan Rojhelato Mîyanên de, xusûsen Rojawan de polîtîkaya qirkerdişî rayra bena. 2014 de semedê xeniqnayîşê Şoreşa Rojawanî hetkarî da DAIŞ’î. Labelê şarê Rojawanî bi paştdayîşê çar parçeyan DAIŞ binkewt û sîstemê xo yê demokratîkî rona. Sîstemê Rojawanî Rojhelato Mîyanên rê bi nimûneyê pîyaciwîyayîşî. Dewleta Tikan a ke tewr zêde nê sîstemî ra tersena, bi ruhê Îtîhat û Teraqî têgêrena. Enver û Telat Paşayan destpêkê Seserra Vîstine de waşt şaran qir bikerê, nika zî Erdogan, Fîdan û Guler eynî çî wazenê. Peyên de Heleb de taxê kurdan rê hêrîşê qirkerdişî organîze kerd û kurdî reyna bi çeteyanê sey DAIŞ û El Qaîde tehdît kerdî.
Yewîya kurdan lez û bez lazim a
Vera nê polîtîkayanê qirkerdişî de, ganî şarê kurdî dest bido yewbînî û helwêstêka neteweyî bimojno. Yewîya kurdan lez û bez lazim a. Dewletê statukoparêzî rijyenê. Çar parçeyan de seba azadîye firsendêko zernên est o. Eke partî û rêxistinê kurdan bi stratejîyêka hewle, bibê yew, serkewtiş do seyî ra se bibo heqê ma. Yewîya stratejîke do şarê ma qirkerdişî ra bixelesno û azad bikero.
