Meleyê dewê Totane ra domane rê hêrişo zayendî

Taxa Totana ya girêdayeyê qezaya Pasûrî (Kulp) ya Amedî bi rojan o bi îdîaya hêrişê zayendîyî hejîyena. Goreyê xebera Ajansê Mezopotamyayî; Meleyê dewe Mehmet Latîf Yepremo ke xo sey "şêx"î dano naskerdene, wextê domanîya aye de M.Y. (18) rê hêrişo zayendîyo sîstematîk kerdo. Hedîse, wexto ke M.Y. do polîsêko ke eynî taxe ra yo û Stenbol de wezîfedar o, ey dir nîkahê resmî bikirdêne vejîya werte. Nîkaho resmî ame betalkerdene û qeydê vengî yê dîyalogêkê mabênê M.Y. û îmamî de vejîya werte.

Îmam: xo bikuwe dest û linganê ci 

Goreyê qeydê vengî yê ke xeylêk ronişteyê dewe serê WhatsAppî ra yewbînan dir pare kerdê, M.Y. vana ke polîso ke a do ey dir nîkah bikira, nîkah ra ver cîgêrayîş kerdo û resayo mesajanê verênan. M.Y. nê vatîşan xebitnena: "Mi nêwaştêne, to bi zorbazî kerd. Ez qic a, kes bi mi bawer nêkeno." Reyna, ana ziwan ke a eşkena bêra kiştene.

Yepremo ke pers keno vano "Nameyê mi senî zano?", hetêk ra hedîse înkar keno, hetêko bîn ra zî vano ke o "kewto ra şeytanî dima" (şeytanî o xapînayo). Yepremo ke M.Y. ra perseno gelo polîsî tayê testî kerdê yan nê, dewamê ci de wina vano: "Sûcê xo meerzê mi ser, ti bena sebebê kiştişê mi. Şeytanî ma xapînayî. Vaje ‘ma çiyêk nêkerd’. Xo bikuwe dest û linganê ci, ma xirab meke. Ma do rezîl bibê. Teyna vaje ke ma yewbînan rê mesajî şawitê. Ey rê vaje eger o (na mesele) nêqefilno, merdim do bimiro."

Vilabîyayîşê qeydê vengî ser o, Yeprem dewe ra tayê kesan dir ame têhet û îdîa kerd ke nê "îftîra" yê. Yepremo ke tim û tim vurguyê "Allah"î kerdêne, vat: "Yew îmtîhan bi û vîyart. Îmtîhanêkê mi yo pîl esto, la mi nêzanayêne ke çi yo. Ma do nê zî bivîyarnê."

Çalakîyanê AKP’yî de 

Yeprem nameyêko ke bi nezdîbîyayîşê xo yê AKP’yî yeno zanayene yo. Tim û tim tewrê çalakîyanê AKP’yî beno. 10 serre ra zêdêr o ke a dewe de îmamtîye keno. Taxa ke Yeprem tede îmamtîye keno, taxa ke tede zafane cerdevanî cuyenê.