Mergê Rojwelat Kizmaze: ‘Mabênê her di dosyayan de seyyewbînanîye esta’

Dêrsim de 5ê Çeleyê 2020î ra nata Gulistan Dokuya ke ci ra xeberêke nîna girewtene, çarçeweya tehqîqatê derheqê ci de nameyanê ke ameyî roje ra yew zî Rojwelat Kizmaz a. Wajîyeno ke mergê şikdarî yê Kizmaza ke embaza Dokuya nêzdî bîya zî bêro roşnîkerdene.

Çarçeweya tehqîqatê Doku de vejîyabi werte ke Serekîya Dozgerîya Komare ya Dêrsimî qeydanê HTS’yî yê Rojwelat Kizmaze waştê û verpersê 'qeydî nêvînîyayî' ameyo dayene.

Embaza Gulistan Doku ya nêzdî bîye

Birayê Rojwelat Kizmaza ke 9ê Sibata 2024î de keyeyê xo yê Taxa Petrole ya merkezê Êlihî ra vejîyaye û rîyê heme cigêrayîş û îxbaranê vînîbîyayîşî yê keyeyî ra 3 rojî dima Gola Bendawê Heskîfî de bedena ci ya bêgane ameye vînîtene, Mehmet Kizmazî derheqê babete de Ajansê Mezopotamya (MA) rê qisey kerd.

Kizmazî vat ke rîyê embazîya nêzdîye ya Rojwelat û Gulistane ra, bîçimê mergê her diyîne zî şik û gumanan virazeno û wina vat: “Serebûtî ke aver şîyî, mi dest pêkerd fikirîya ke çîyê ke qewimîyayî nêeşkenê bi yew kesî bêrê îzahkerdene, beno ke yew awanîya hîna hera û organîzekerde est ba.”

Kizmazî dîyar kerd ke cayêko zey Dêrsimî ke her nuqtaya ci de kamera û asayîş esto de vînîbîyayîşê yewînsanî bi nê hawayî teberê mentiqî de yo û da zanayene ke dima ke Doku vînî bîye, waya ci Rojwelate wextêko derg Dêrsim ra nêvejîyaye û seba vînîyayîşê Gulistane xîret kerdo. Kizmazî wina dewam kerd: “Nê prosesî serê waya mi de tesîrêko cîdî viraşt. Bê Gulistane nêwaştêne Dêrsim ra vejîyo. Tewr peynî de wexto ke ameye Êlih zî, her averşîyayîşê derheqê Gulistane de teqîb kerdêne.”

‘Waya mi wexto ke sax bîye nêameye cigêrayene’

Kizmazî pare kerd ke dima ke Rojwelate saetanê serê sibayî de keyeyî ra vejîyaye ê şikdar bîyî û rîyê îxbarê vînîbîyayîşî yê qereqolî ra zî 3 rojî qet yew teşebusê cigêrayîşî nêameyo kerdene û vat: “Roja yewşemeyî ver bi esrî şîyayîşê ci yê Heskîfî ma bi xîretê xo musayî. Roja dişemeyî saete 11.30 de zî bedena ci awe ra yena vetene. Goreyê ercnayîşê pisporê tipê edlîyî yo ke kewt otopsîya waya mi, dima ke waya mi keyeyî ra vejîyena hîrê rojî sax manena û roja yewşemeyî weşîya xo vînî kena. Yanî waya mi wexto ke sax a nîna cigêrayene.”

Dosyaya ci ameye girewtene

Kizmazî destnîşan kerd ke rîyê qeydanê kameraya yê dosya de, dima ke Rojwelate keyeyî ra vejîyena nîşena mînîbus û şina Heskîf asenê, labelê dima qerarê 'teqîbat rê hewce çin o' dîyayo û vat: “Yanî raştîya ci de zereyê o qerarî de zî, waya mi ça de ya, kamcî rayîr xebitnayo û senî eşkena bêro vînîtene eşkera asayêne. No zî yeno nê manayî; eke wezîfe ameyêne caardene, kamerayî ameyêne tedqîqkerdene û cayanê eleqedaran rê wextê ci de xeber dîyayêne, bi saetan de eşkîyayêne biresê waya mi. Labelê no nêame kerdene.”

‘Saxnêmendişê înan yewbînan ra cîya nîyo’

Kizmazî qeyd kerd ke ewro saxnêmendişê di embazanê nêzdîyan Gulistan Doku û Rojwelate yewbinan ra cîya nîyo û wina vat: “Mabênê her di dosyayan de seyyewbînanîyêka muhîme esta; şiklê rayraberdişê prosesan. Proseso ke waya mi arde nê nuqte, vengîya ke vînîbîyayîşê embaza ci ya nêzdîye viraştbi û nêeşkereyîya derheqê weşîya ci de bîye. Sebebê ke her diyîne zî berdî merg, hempar bîyî. Polîtîkayêka xusûsîye, merdim eşkeno nê rê vajo polîtîkaya şerê taybetî zî. Wextê ci de mudaxalenêkerdiş, mesulîyetnêgirewtiş û yew zêhnîyeto ke wezîfeyê xo nêkeno…”