Rojnamegero ke hetê hêzanê tarîyan ra ame vîndîkerdene: Nazim Babaoglu
Kesanê ke aqûbetê ey nêeşkerayî, dosyayê ey bêçareserî de veradayî û waşt ke o vîrî ra şêro, wa baş bizanê ke; ma do ey qetî vîrî ra nêkerê û nêdê vîrîkerdene.
Serê vîndîkerdişê Nazimî ra tam 32 serrî vîyartî. Nazim Babaoglu, vengûvajêrê rojnameyê Ozgur Gundemî yê Riha bi. O, tarîxê 12ê Adara 1994î de seba viraştişê yew vengûvajî şibi Riha û a roje ra pey tu kesî ey ra agahî nêgirewte. O, rayîrê heqîqetî de, bi hezaran rojnamegeranê bînan ra yew bi û seba ke rastîyê cografyaya xo bîyaro ziwan, xo kerd feda. Ma ewro bi wesîleya serrgêra 32. ya vîndîkerdişê ey, ey bi hurmet, hez û minet anê vîrê xo.
Bedelê heqîqetî
Serrê 1990î, seba şarê ma serrê zaf zehmetî û tarî bîyî. Bi desan rojnamegerî, roşnvîrî û welatperwerî hetê faîlanê nêdîyareyan ra ameyî qetilkerdene yan zî ameyî vîndîkerdene. Tarîxê 12ê Adara 1994î zî, qeydê rojnamegerîya azade de sey yew roja sîyaye ca gêno. Nazim Babaogluyî waştbî ke vengê şarî, derd û kulê bindestan bîyaro rîyê erdî. Labelê kesê ke raştîye ra tersenê, nêwaşt ke no veng bêro eşnawitene. Nazim Babaoglu seba karê xo yê rojnamegerîye şibi Riha la reyna qet nêagêra. Kesanê ke o vîndî kerd, waşt ke qelema ey bişiknê û raştîye binê erdî de wedarê.
Bêverpersîya Dewlete û edaleto vîndîbîyaye
Hukmat û dewlete, nê 32 serran de no dosya tim û tim kerd derg, nêwaşt ke faîlê nê qetlîyamî û vîndîkerdişî vejîyê orte. Domanê vîndîbîyayeyan, Dayîkê Şemîye û xebatkarê çapemenîya azade reyna û reyna edalet waşt la no waştiş heta ewro bêverpers mendo. La wa nê hêzê tarîyî rind bizanê; bi vîndîkerdişê bedenan, heqîqet û rastîye vîndî nêbenê û nêşinê binê erdî.
Mîrasê Nazimî dimaamayoxanê ey rê yo, mîraso ke Nazimî ma rê veradayo, ewro hetê hemrayan û dimaamayoxanê ey ra yeno pawitene. Qelema ey erd de nêmenda. 32 serrî yo ke rojnamegerê azade, bi heman qerardarî û cesaret peyê şopanê ey de şinê. Çend serrî vîyarenê wa bivîyarê, seba Nazim Babaogluyî têkoşînê edaletî û heqîqetî do qet nêqedo.
Kesanê ke aqûbetê ey nêeşkerayî, dosyayê ey bêçareserî de veradayî û waşt ke o vîrî ra şêro, wa baş bizanê ke; ma do ey qetî vîrî ra nêkerê û nêdê vîrîkerdene. Tekoşînê Nazim Babaogluyî, ewro zî rayîrê ma roşn keno. Heta ke edalet ca nêgêro, faîlê ey û êyê ke fermanê ci dayê nêrê muhakemekerdene, na dewa do dewam bikero. Vengê ey vengê ma yo, qelema ey rûmetê ma ya!
