Roşanê Newrozî

 Ehmedê Bira

Çîroka Newrozî 2638 serrî verê cû ra, heta na game ameya. 21ê Adare roja azadîya kurdan a. A roje ra heta na roje kurdî her wesar aşma Adare de Roşanê Newrozî bimbarek kenê.

Goreyê manaya Newrozî, na rojeka newey a. Na aşme de, yanî 21ê Adare de heme çî hewnê zimistanî ra heşyar benê (werzenê). Destpêkerdişê serêka newey a, azadîya bîganeyan û bêganeyan a. Yê tewr muhîmî azadîya kurdan a û verba zaliman serewedaritiş o. Nê semedî ra bi hezar serran o ke kurdî 21ê Adare de Roşanê Newrozî pîroz û bimbarek kenê.

Goreyê tarîxê Newrozî, V.Z. (Verê Zayîşî) 612 de yanî 2638 serrî ra ver, 'qiral Dehaqî' her roje serê çend tûtan ango ciwananê kurdan û şaran bi zorî dayêne birnayene û werdêne. Goreyê çîroke, zalim Dehaq û dormeyê ey, semedê ke nêweşîya xo ra rizgar bibê, goşt û mezgê ciwanan û merdiman werdêne... Şarê kurdî semedê ke domanê înan nêrê qetilkerdiş, domanî şirawitêne koyan. Koyan de ciwanê ke verba zalim Dehaqî remabî est bîy. Roje bi roje, serre bi serre, koyan de ciwananê kurdan û şaran nîzam û rayvistişê (rêxistina) xo awan kerd. Domanî bîbî ciwan, ciwanî zî bîbî merdimê pîlî... Roj û serrî ravêrd bîy... Mîyanê şaran de domanî hema zî bi zordestîye ameyêne remnayene û birnayene.

Kawayî sere wedarit

Kawa, merdimeko ke karê ey asinkarî bî, ango amûrên zey şimşêr, gurz, tîr û kewan û z.b. viraştêne. Ey zanayêne ke zalimî kiştiş heq kerdo. Têkilîya xo bi ciwananê koyan xurt kerdbi. Plan û hesabanê xo, têkilîya bi her hawayî ciwanan reyde ronabi... Çek û werdê ciwanan bi serran bî ke bi mîlîsan berdêne koyan. Ciwanan perwerdeyê çekan zî dîbi.

Şewa 21ê Adare

Kawa 21ê Adara V.Z. 612 de xeber şiraweno koyan û vano: '...Şewe wexto ke şima qesra Dehaqî de dî ke adir berz beno, şima bizanê ke mi Dehaq kişto, o wext koyan û cayanê xo ra bêrê war û hetkaranê zaliman ê mendeyan zî ma pak bikerê...' Kawa Dehaqî kişeno û adir wekêno (ta keno). Ciwanî yenê war zaliman kişenê û zilma zaliman rê peynî anê. Edî gonîya ciwanan nêherikîyayêne. Şarê kurdî û şarê bînî a roje ra pey bi şahî û geşîye 21ê Adare bimbarek kerdî heta na game.

Cenimê Estaymî (Epsteînî)

Tîya de ez çîyêk nîşan bidî. Ewro dewaya Estaymî xo nîşan kerda ke zaliman bi hezar serran verî senî gonîya ciwanan rijnayêne, ewro zî bi hawayêko nimitkî dewam kenê. Gelo Kawayêko bîn do bivejîyo? Do reyna kurdan mîyan ra do bivejîyo? Ango cayêkê bînî ra do bivejîyo? La aseno ke do bivejîyo, ma bivînê yan nêvînê dîyar nîyo.

Cenimê Estaymî de ma vînenê ke zaf zalimî semedê ke nêweşîya xo ra rizgar bibê, bi têgêrayîşêkê organîze û rayvisteyî, domanî remnayê, sereyî birnayê, gonî şimitê, mezgê înan zey Dehaqî werdê...

Estaym dewam bikero ra, şer esto

Goreyê xeberanê vejyayeyan û na game sergirewte dewam kenê; nameyê Trump û ekîba ey, serekê dewletanê Ereban ra zafêrî, zafêrîya serek û rayvistinê Ewropa, serek û rayvistinê tirkan û Îsraîlî ravêrenê. Her çiqas şarê DYA şer nêwaştbo zî, Trump wazeno dinyayî têmiyan bikero ke dosyayê Estaymî nêro rojeve û rojeve bi şerî îdare bikero. La zilmkerdox kamcin roje bo do hesab bidero...

Bi se serran o ke zalimî gonîya şaran û kurdan ser o hakîmîyet kenê. Welatan talan û wêran kenê, vêşan veradanê û zey koleyan xebitnenê û zengînîya welatan zey qijnigêk luyenê (dimijenê)... Semedê ke pîsîya înan nêro vînayene ra goreyê xo qanûnan virazenê... Bêedaletî hemeyê dinya de vila bîya...

Teknolojî peynîya merdiman ana

Dewletan hinî kerdo ke bi teknolojîya çekan, şaran û ameyoxê şaran kerdo talûkeyêkê zaf xedarî mîyan... Hinî aseno ke merdimî do bi teknolojîya xo peynîya xo bîyarê.

Çimkî serdestî warê çekan de yê, bindestî zî mecbûr ê ke gurweyê înan bikerê û zilmo ke vînenê ra, zaliman bi se serran o ke bi dakoçkerdiş, talankerdiş, xenîmet û bêedaletî gonîya ciwanan û merdimanê belengazan şimita û dewam kenê... Yanî Dehaqîya ewroyî bi sîyaseta zûrkerî dewam kena. Vindarnayîş lazim o. Semedê ke vindero, sîfte Kawayêk û mazlûmê ke zirar dîyo ra rayvistişêka bi pergal û bi hêz ferz a. Ey ra pey zî adirê Kawayî yê 21ê Adare lazim o.

Ma vîra nêkerê NEWROZ sembola azadîya kurdan û şaran a.