Seba Meşê Gemlîkî do Meydanê Şêx Seîdî ra rayîr vejîye
TJA, 18ê Nîsane de seba Meşê Gemlîkî, Meydanê Şêx Seîdî de do bêro têhet û vejîyo rayîr. Aktîvîsta TJA’yî Bahar Pekere vat: "Awa ke azadîya fîzîkîye ya Birêz Ocalanî bêra caardene, yew lezkanî ya."
Têgêrayîşê Cinîyan ê Azadan (Tevgera Jinên Azad-TJA), bi şîarê “Wextê cinîyan, wextê azadîye û Rayberîya Azad reyde têhetamayîşî yo” 19ê Nîsane de do Gemlîk de bo. Aktîvîsta TJA’yî Bahar Pekere ke derheqê çalakîya cinîyan de qisey kerd, bale ante girîngîya azadîya Rayberê Şarê Kurdî Abdullah Ocalanî ser.
Goreyê xebera Ajansê Mezopotamyayî, Bahar Pekere vîr vîst ke Prosesê Aştîye û Komelê Demokratîkî yo ke Rayberê Şarê Kurdî Abdullah Ocalanî dabi destpêkerdene kewto aşma xo ya 14ine û wina vat: “Ma vînenê ke 14 aşmî yo derheqê ci de ‘heqê hêvîye’ nêno xebitnayene. Wexto ke ma ewnenê nê prosesî ra, Rojhelatê Mîyanênî de yew cenderaya şerî esta. Sînorî yenê dîzaynkerdene. Bi nê prosesî reyde têkoşîno hempar yê şaran cayêko girîng gêno. Kurdan xeylêk gamî eştî. La çi heyf ke ma 14 aşmî pey de veradayî zî hema hetê dewlete ra gamê şênberî nêerzîyayê.”
Gama dewlete ya verêne
Bahar Pekere da zanayene ke gama dewlete ya verêne ganî dayîşê “heqê hêvîye” yê Abdullah Ocalanî bo û wina domna: “Pêardişê azadîya fîzîkîye ya Birêz Ocalanî lezkanî yo. Çunke seba Birêz Ocalanî ‘heqê hêvîye’ yeno manaya ‘heqê hêvîye’ yê heme şarê kurdî. ‘Heqê hêvîye’ yeno manaya ‘heqê hêvîye’ yê cinîyan û ciwanan.”
Bahar Pekere derheqê “heqê hêvîye” de qerarê ke AÎHM û Komîteya Wezîran a Parlamentoyê Ewropayî girewtê, vîr vîstî. Bahar Pekere qayd kerd ke vera şarê Kurdî hêrişêko emperyalîst esto û wina ard ziwan: “Rastîya ci de wexto ke ma ewnenê vîyarteyî ra, ma vînenê ke Birêz Ocalan sey rehîne ameyo girewtene û ardişê Tirkîya ra dima 29ê Hezîrana 1999î de ceza dîyaya ci. Ma vînenê ke Şêx Seîd û embazê ci zî eynî tarîx de cezaya îdamî girewta. No tesaduf nîyo. Seba azadîya fîzîkîye ya Abdullah Ocalanî cinîyî tim meydanan de yê, nê çarçeweyî de ma Anqara rê meşîyenê, 8ê Adare û 4ê Nîsane de zî bi nê waştişî ma do meydanan de bîbê.”
Bahar Pekere qala Meşê Gemlîkî kerde û wina qedîna: “18ê Nîsane de saete 9.30 de ma do Meydanê Şêx Seîdî de cinîyên ke şaristananê Kurdîstanî ra yenê reyde bêrê têhet. 19ê Nîsane de ma do Bursa Gemlîk de bibê. Coka ma heme şarê xo yê Amedî dawet kenê oxirkerdişê embazanê cinîyan ê ke şinê Gemlîkî.”
