Tehlûkeyê vînbîyayîşî ver de zazakî û hewramkî; sereberzîya kulturî

Mintiqaya Hewramanî ya Kurdîstanê Başûrî, teberê tebîet, kultur û hunerê xo yê dewlemendî de, wayîrê zaravayê xo yê taybetî yê hewramkî ya zî. Hewramkî û zazakî, zaravayanê kurdkî yê tewr kehan û dewlemendan ra yew ê. La nika, rîyê xemsarîya Hukmatê Başûrî, sazî dezgeyanê Vakurî û tayê sebebanê bînan ra, tehlûkeyê vîndîbîyayîşî kewto zazakî û hewramkî ser.

Seba ke no tehlûke wedarîyo, ganî Hukmatê Herême, sazî û dezgeyê Vakurî, hetê eleqedarî, sîstemê perwerdeyî de dersêka zazakî û hewramkî ronê. Eke dersa zazakî û hewramkî nêkewê sîstemê perwerdeyî mîyan û nêkewê wendegehan, no bi xo beno tehlûkeyêko gird. Heta nika qet yew kanalê fermî zî çin o ke giranîye bido averberdişê nê zaravayan.

Her şar bi veng, reng û kulturê xo sereberz o; sey zaza û hewramîyan, ma zî bi kulturê xo sereberz î. Qasê ke destê ma ra yeno, ma zarava û kulturê xo pawenê. Eke pêro şarê ma û domanê înan bi hewramkî û zazakî qisey bikerê, o wext zaravayê ma hîna zaf yeno pawitiş. La verê ma de tayê astengî û zehmetîyê estê û ganî ma înan ra derbas bibê.

Ma wazenê ke wext dima nê problem û astengîyê çareser bibê û wendegehan de dersa hewramkî û zazakî bêra dayîş. Çalakwan û roşnvîrê seba çareserkerdişê nê probleman mîyanê xîretî de yê. Nika zaravayê ma hewramkî û zazakî vîndî beno, la ma dest ci ra nêberdenê. Çîyo rind o yo ke, roşnvîr û çalakwanê şarê ma wazenê zazakî û hewramkî gane bikerê û aver berê. Seba ke dersa zazakî û hewramkî bikewo sîstemê perwerdeyî mîyan tayê hewl û xîretî estê, la heyf ke nê hewlî hema zaf sist û lawaz ê.