TEV-ÇANDê bi strana ‘Biparêze’ piştgirî dan Rojava
Piştî êrîşê li ser Rojava zêde bûn, berxwedana gel jî zêde bû. Hunermendên TEV-ÇAND û Hunera Mizgîn ji bo piştgiriya berxwedana Rojava strana ‘Biparêze’ çêkirin û Med Huner Production jî klîb kişand.
Deh stranbêjên TEV-ÇAND û Hunera Mizgîn ji bo berxwedana Rojavayê Kurdistanê bi hev re stranek gotin û klîbek kişandin. Navê stranê "Biparêze" ye. Gotin û muzîk ji hêla Hekîm Sefkan hatiye çêkirin. Mazlûm Rewşen jî qeyd û aranjeya stranê amade kiriye. Med Huner Production ji bo stranê klîbek kişandiye. Dîmenên klîbê ji meşa Kolnê ya 24’ê Çileyê ku bi sed hezar kes beşdarî bûbû, hatiye girtin. Dîmenên klîbê Sîfilm girtiye û Tarik Demîr jî edîta wê amade kiriye.
Stranbêjên ku di nav xebata stranê de cih girtine ev in: Beser Şahîn, Sosin, Zozan Zûdem, Binevş Roj, Bermal Çem, Hekîm Sefkan, Talat Yeşîl, Alî Jiyan, Zahîr Loran û Sîpan Xelat.
Kîlb li ser malpera Youtube ya Med Hunerê hat parvekirin.
Gotinên stranê bi vî rengî ne:
Rojava nav û şane, cenge û hêê
Şûr ji kalan kişyane, şinge û hêê
Zengil lêdaye çinge, çinge û hêê
Ne zûye û ne derenge, cenge û hêê
Zengil lêda çinge
Şûr kişyaye şinge
Ferman şer û cenge
Ferman şer û cenge
Rojava berxwedane, em rabin tev
Rûmeta Kurdistane, dest bidin hev
Bi hev re biparêzin, bi roj û şev
Rê nadin hov û gura, fermane ev
