Uveyş Ocalane serê gorê xo de ameye yadkerdene
Maya Rayberê Şarê Kurdî Abdullah Ocalanî, Uveyş Ocalane; serra 33. ya mergê xo de, Amara de serê gorê xo de ameye yadkerdene
Maya Rayberê Şarê Kurdî Abdullah Ocalanî, Uveyş Ocalane, serra 33. ya wefatê xo de qezaya Xelfetî ya Riha, Amara de serê gorê xo de ameye yadkerdene. Yadkerdiş bi serkeşîya Têgêrayîşê Cinîyan ê Azadan (TJA), Meclîsê Dayîkê Aştîye û Platformê Cinîyan ê Şaristanê Rihayî de ame viraştene. Xeylê endamanê keyeyî û zaf cinîyî tewrê nê yadkerdişî bîyî. Goristanê Taxa Amara de gorî rê vilikî ameyî ronayene û çarçewaya yadkerdişî de fîdanî ameyî ramitene.
Hemsereka DEM Partî ya Rihayî Ayşe Surucuye ke yadkerdiş de qisey kerd, ard ziwan ke şexsê Uveyş Ocalane de ê pêro “dayîkanê xoverdayîşî” yad kenê û wina vat: "Ma zî şexsê Dayîka Uveyşe de mayanê xoverdayîşî, mayanê qehremanan, ê mayanê ke çimê înan rayîrê domananê înan de mendî û merdî, yad kenê û verê înan de bi hurmet serê xo tewnenê. Maya Uveyşe yew maya zaf xurt û xebatkare bîye. A maya Rayber Ocalanî bîye. Ma wina bişans ê ke, Maya Uveyşe Rayber Ocalan ard dinya. Ewro Serek Ocalan şarê kurdî, şaranê Tirkîya û Rojhelatê Mîyanênî de yew cuya newîye awan keno. Ma vanê ke; Maye, felsefeyê Rayber Apoyî yo ke to ardo dinya, nê welatî de aştî, çareserî, yew cuya azade û birûmete virazeno."
