Zîndanê Qizilhesarî de 9 tepişteyê sîyasîyî ameyî tecrîdkerdene
9 tepişteyê sîyasîyî yê ke Zîndanê Evînî ra surgûnê Zîndanê Qizilhesarî yê Tehranî ameyî kerdene, eştî hucreyanê yewkesîyan û heqanê xo yê bingehînan ra bêpar ameyî verdayene
Ajansê Xeberan ê Aktîvîstanê Heqanê Merdiman (HRANA) bi raporêk da zanayene ke 9 tepişteyê sîyasîyî yê Zîndanê Evînî, surgûnê zîndanê pîlî yê Tehranî Zîndanê Qizilhesarî ameyî kerdene û hucreyanê yewkesîyan de yenê tepiştene.
Ame eşkerakerdene ke tepişteyî heqanê xo yê sereke û bingehînan ê sey heqê telefonî û îmkananê weşîye ra bêpar yenê verdayene. Tayê nê tepişteyan heta nika hetê dadgehê Îranî ra bi cezaya zîndanî ya demderge amebî mehkûmkerdene. HRANA dewamê raporê xo de derheqê zêdebîyayîşê zextanê rejîmê Îranî yê ke aktîvîstan, destbendkerdeyan û tepişteyanê sîyasîyan ser o yenê kerdene de, hişyarîye daye.
