2yê Adara 1994î û îradeya ke ameya tepiştene
Vîrardişê 2ê Adare, semedê famkerdena tarîxê sîyaseta kurdan zaf girîng o. Semedê yew ameyaxeyo aştîyane û weş, ganî qedr û qîymet bidîyo îradeyê şarî û problemî Meclîs de bêrê çareserkerdene
2ê Adara 1994î, tarîxê sîyasetê kurdan û Tirkîya de roja de sîya ya û zaf muhîm a. Na roje de, meclîsê Tirkîya (TBMM) de bêdestûrîya wekîlanê Partîya Demokrasîye (DEP) ameye wedaritene. Dima zî wekîlê ke bi rayanê şarî ameybî weçînayene, kuçeyanê Enqere de hetê polîsan ra ameyî tepiştene û ameyî eştene zîndanan.
Wekîlê sey Orhan Doğan, Leyla Zana, Hatip Dicle, Ahmet Türk, Sırrı Sakık û Mahmut Alınak, verê çimanê heme dinya de, bi zorbazî zereyê meclîsî ra ameyî vetene. Fotografê Orhan Doganî yo ke destê yew polîsî qirikê ey de yo, qet vîrê şarî ra nêşîyo. No kerdiş, tena vera çend wekîlan nê, bi temamî vera îradeya şarê Kurdî ameybi kerdene.
Şarî bi hezar zordarî û astengîyan ê erşawitbî Meclîs, la pergalî qebul nêkerd ke kurdî bi ziwan û nasnameyê xo Meclîs de sîyaset bikerê. Waştişê heqanê demokratîkan û qiseykerdena bi ziwanê dayîke, bîyî sebebê nê hêrişî.
Pêvajoya ke dima dest pêkerd, semedê sîyaseta demokratîke zaf bi zehmet bi. Partîya DEP'î ameye girewtene. Wekîlanê tepişteyan qasê des serrî zereyê zîndanan de mendî. Na rewşe mojna ke dewlete nêwazena bi rayîrê aştî û dîyalogî nê problemî çareser bikera. La no nêheqîyê gird, têkoşînê sîyasî yê kurdan qet nêda vinderte.
Her çiqas zextî zêde bîyî zî, şar wayîrê îradeyê xo vejîya. Partîyê neweyî sey HADEP, DEHAP, DTP, BDP, HDP û ewro DEM Partî ameyî ronayene. Şarî reyna rayîrê sîyasetê sivîle de israr kerd. Wekîlanê DEPî zî zereyê hepisxaneyî de xoverdayîşê xo domna û dima ke vejîyayî zî, mîyanê şarê xo de xebata aştîye kerd.
Ewro ma ewnenê ra, serê 2ê Adara 1994î ra bi desan serrî derbaz bîyê. Tarîx de na roje sey "Derbaya 2ê Adare" yena pênasekerdene. Zihnyeto ke o wext wekîlî eştî zîndan, hema zî bi hawayêk dewam keno û sîyasetmedarî reyna yenê tepiştene. Labelê israrê şarî yo semedê sîyaseta demokratîke û aştîye zî hîna xurtêr bîyo.
Vîrardişê 2ê Adare, semedê famkerdena tarîxê sîyaseta kurdan zaf girîng o. Semedê yew ameyaxeyo aştîyane û weş, ganî qedr û qîymet bidîyo îradeyê şarî û problemî Meclîs de bêrê çareserkerdene.
