Amed de seba ziwanê dayîke rayîrşîyayîş: Ziwanê ma rûmet û estbîyayîşê ma yo

Platformê Sazîyanê Demokratîkan, bi wesîleya 21ê Sibate Roja Ziwanê Dayîke ya Dinya, Amed de yew rayîrşîyayîş viraşt. Hemsereka Pêroyî ya Partîya Herêmanê Demokratîkan (DBP) Çigdem Kılıçgun Uçare zî tewrê rayîrşîyayîşî bîye. Çalakîye de pankarta bi nuşteyê; ‘’Statuyê kurdkî perwerdeyo kurdkî” ameye akerdene û dowîzê bi nuşteyanê; “Wext wextê ziwanê kurdkî yo”, “Ez kurd a, ez perwerdeyê kurdkî wazena” û “Azadîya ziwanê kurdkî bingehê aştîye yo” ameyî berzkerdene. 

Heto bîn ra rayîrşîyayîş de zaf reyî slogananê “Ziwan rûmetê ma yo” û “Bê ziwan cuye nêbena” ameyî vatene. Qiseykerdişê destpêkî yê çalakîye hetê Rifat Ronîyî ra ame kerdene û nê çîyî ardî ziwan: ‘’Kurdkî semedê estbîyayîşê şarê kurdî yo. Ronîyayîşê Komare ra nika şarê kurdî wazeno ke ziwanê înan bibo wayîrê statuyî û ziwanê perwerdeyî. Heta ke no waştiş qebul bibo ma do têkoşînê xo bidomnê."

Dima ra mamostayê ziwanê kurdkî Nuh Bozkurtî metnê çapemenîye bi kurdkî wend û veng da ke statuyê kurdkî bêro şinaskerdene û kurdkî bibo ziwanê perwerdeyî.

Hemsereka Pêroyî ya DBP Çigdem Kılıçgun Uçare zî bale ante zextanê serê ziwanê kurdkî ser û vengê dewlete da ke peynîye bido polîtîkayanê xo yê înkarî, gamê qanûnîyî bierzo û wina qisey kerd: “Ewro seba azadî û ameyoxê ziwanan yew roja girîng a. Ma eşkenê pîya hêrişanê vera ziwanê kurdkî pûç bikerê. Birêz Ocalanî tim bale anta girîngîya têkoşînê seba kurdkî ser û da zanayene ke ganî nê babetê de têkoşîn bêro averberdene. Ziwanê ma rûmetê ma yo. Ziwanê ma estbîyayîşê ma yo.’’

Çalakîye dima ke govend ameye antene, peynî bîye.