‘Azadîya Ocalanî beranê demokrasîyêka xorîne akena’
Fîlozof-sosyolog John Holloway bi munasebetê serrgêra vengdayîşê 27ê Sibate erjnayîşê xo pare kerdî û vat ke azadîya Rayberê Şarê Kurdî Abdullah Ocalanî hem seba hewanayîşê bêedaletîyêka girde hem zî seba akerdişê rayîrê prosesê pêameyîşê demokratîkî ciwîyayî ya
Rayberê Şarê Kurdî Abdullah Ocalan serrgêra 27ê Sibate de mesajêko tarîxî da, Tirkîya de êdî proseso pozîtîf dest pêkerd. Fîlozof-sosyolog John Holloway zî bi munasebetê serrgêra vengdayîşê 27ê Sibate erjnayîşê xo pare kerdî
Goreyê xebera ANF’î Hollowayî wina vat: "Bes o hende şer bî, bes o hende zordayîş û teda est bî. Hewcedarîya pêameyîşî est a ke kultur, adet û grûbê komelkîyan ê cîya-cîyayan bişinasnê û qebul bikerê. Azadîya Ocalanî nê prosesî de bena gamêka zaf muhîme."
Hollowayî dîyar kerd ke Meksîka de eserê Ocalanî newe-newe yenê wendene û zaf yenê munaqeşakerdene: "Fikrê ci seba viraştişê prosesêk ke pêşinasnayîşî ser o bo, raşta zî binge virazeno."
Hollowayî îfade kerd: "Ocalan derheqê pîyaciwîyayîşî de formêko tamamen cîya yê fikirkerdişî rê rayîr akeno" û vat ke eke dewleta tirke têkoşînê kurdan bişinasna û waştişê hemwelatîya seypê û otonomîye qebul bikera no beno vurîyayîşêko demokratîk û gird.
Holloway peynî de vat: "Demokrasîyêka xorîne ke merdimî nêrê tebervetene, bêrê girewtene mîyanê prosesî raşta zî şêna bêro viraştene. No fikrêko xerîb nîyo, şêno bêro kerdene. Ez bi zerrî hêvî kena ke dewleta tirke mesajê haştîye yê Ocalanî rê cewabêko pozîtîf bido."
