Binpaykerdişî hepisxaneyan de xorîn benê

Pawitox Rihane Gok derheqê binpaykerdişanê hepisxaneyan de Ajansa ANFyî rê erjnayîşî kerdî.

Derheqê muracatan de: Rihane Gok îfade kerd ke problemê hepisxaneyan her roje zêde benê û vat: "Komîsyonê ma rê gelek muracatî yenê. Çi heyf ke destpêkê nê muracatan de binpaykerdişê heqê weşîye, binpaykerdişê heqê têkilî û xeberegirewtişî û binpaykerdişê heqê azadîya kesî û emnîyetê huqûqî yenê ke rîyê qeraranê Heyetê Îdare û Çimdarî ra vejîyenê meydan. Muracatî vera heqanê tewr bingeyinan ê tepişteyan zaf bîyê, no nîşaneyê tabloya hepisxaneyan o."

Derheqê sansurê kitaban de: Goka ke bale ante ke sansur gelek warî de dewam keno, vat: "Tepişteyî nêeşkenê biresê kitab û weşanan. Gelek hepisxaneyan de tena kanalê televîzyonî yê ke îdare dîyar keno yenê mojnayene. Derheqê rojname û kovaran de zî tablo eynî ya. Gelek rojname û kovarê ke tu qerarê arêkerdişî seba înan çin o, bi temamî qanûnî yê, tepişteyan rê nêyenê dayene. Sey nimûne, mi tesbît kerd ke tay kitabê derheqê tarîxê huner û felsefe de yê, hetê yewînanê perwerdeyî ra sey nêmunasîb yenê dîyene û tepişteyan rê nêyenê dayene. Heta ez musaya ke yew kitab seba ke resmêkê demê Serdemê Mîyanênî tede bî, hepisxane de nêame girewtene. Yew resm bi seserran o resaye nê demî la ewro nêeşkeno bikewo hepisxane. Fehmê Serdemê Mîyanênî yo raştkên tam tîya de vejîyeno meydan."

Derheqê heqê pêdîyayîşê bi dîmenî de: Goke vat: "Tatbîqê ke vera prensîbê seypêyîya înfazkerdişê cezayan o, heqê pêdîyayîşê bi dîmenî yo. Heqê ke tepişteyanê edlî rê yeno dayene, tepişteyanê polîtîkan rê nêyeno dayene. No tatbîqo antî-demokratîk nêeşkeno bi mewzûatê nikayî bêro meşrûkerdene. Heqê xeberegirewtişî heqanê tewr bingeyinan ê merdimî ra yew o. Qerardayîş vera naye de ke kam wayîrê nê heqî bo wezîfeyê îdareyî nîyo."

Derheqê tepişteyanê nêweşan de: Goke vat ke heqê weşîye waranê tewr giranan ê binpaykerdişî ra yew o: "Krîzê heqê weşîye yo ke hepisxaneyan de ciwîyeno, vera hezaran waştiş û muracatan zî, hema nêame çareserkerdene. Ewro hema hezarî ra zafêr tepişteyê nêweşî ke hepisxaneyan de têkoşînê cuye danê, est ê. Şertê fîzîkî yê xirabî, werdişê nêbesî, neramitişê prosesanê tedawîye, nêşawitişê nêweşxane û nêveradayîşê tepişteyanê nêweşan her roje netîceyanê hîna giranan danê. Hela ke îmkanê zanistî û teknolojîkî yê nê demî gama bêrê fikirîyayene, nê problemî şênê bêrê çareserkerdene. Vurnayîşê heqê weşîye bi hacetêkê cezakerdişî qebûl nêbeno."

Derheqê yew merdişî de: Goke muracatêko nizdî pare kerd: "Nêzdîyan de keyeyêkê tepişteyî muracat kerd ke domanê înan hepisxaneyê Tîpê T yê Amedî de yo û demêk o problemê weşîye yo cîdî ciwîyeno. Pişta tepişteyî de birînêka girde est bîye û waştbî şêro nêweşxane. Bi xirabbîyayîşê halî vejîyabî revîr la uca tu mûayene nêame kerdene. Embazanê ey ê koguşî zî gelek rey personelan ra vatbî ke ganî bireso nêweşxane. La reyna zî karê şawitişî nêame caardene. Revîr de tena yew krem ame dayene û agêra koguşê xo. Hela ke nîşanê enfeksîyonî eşkera bî. Nêzdî 15 rojan nêweşîya ci aver şîye, dima resa nêweşxane û di rojî dima cuya xo ra bî."

Derheqê Heyetê Îdare û Çimdarî de: Goke vat ke tatbîqê ÎGKyî yê vera tepişteyanê polîtîkan bingeyê huqûqî ra mehrûm ê: "Nê heyetî, serra 2020î de bi serûberkerdişan ameyî awankerdene. La bi awanîya xo antî-demokratîk û meşrû nîyê. Demê înfazkerdişê cezayî yê yew kesî hetê mehkeme ra dîyar bîyo û peynîya nê demî de ganî kes bireso azadîya xo. La ewro ÎGKyî bi erjnayîşanê subjektîfan eşkenê veradayîşê însanan steng bikerê. Salahîyetê sînorkerdişê azadîya kesî tena yê mehkemeyan o. Tu heyetê îdarî nêeşkeno bê qerarê mehkeme seba azadîya însanan tesarûf bikero."

Derheqê çareserî de: Goke vat: "Problemê hepisxaneyan êdî resayê noqteyêka ke nêeşkenê bêrê taloqkerdene. Ganî şertê hepisxaneyan goreyê standardanê universalan ê heqanê merdiman bêrê serûberkerdene. Ganî tatbîqê sey ÎGKyî yê ke meşrûîyetê huqûqî çin o, bêrê hewanayene. Ganî veradayîşê tepişteyanê nêweş û extîyaran bê şert û merc bêro caardene. Ganî hepisxaneyî hetê heyetanê doktoranê serbestan, avûkatan, muhendîsan û psîkologan ra biserûber bêrê kontrolkerdene.Temînkerdişê prensîbê seypêyî yê înfazkerdişê cezayî û serûberkerdişê qanûnî yê hewceyî êdî mecbûrîyetêk ê ke nêeşkenê bêrê peygoşkerdene."

Çime: ANF