Cayanê cîya cîyayan ê Sûrîyeye de 5 kesî ameyî kiştene

Herêmanê cîya cîyayan ê Sûrîyeye de 24 saetanê peyênan de weqayê alozîyî, teqayîşê mayînan, hêrişê çekdarîyî, dizdîye û remnayîşî qewimîyayî. Netîceya nê serebûtan de kişteyî û birîndarî virazîyayî. Goreyê agahîyanê ke dest de yê; taxa Sebahîya ya şaristanê Reqa de mîyanê yew grûba çekdare û hêzanê asayîşî yê hukmatê demkî yê Sûrîyeye de pêkewtiş vejîya. Pêkewtiş de 4 kesî ameyî tepiştene.

Wexto ke 4 karmendanê rêxistina mîyanneteweyîye ya Blumontî maaşî berdêne kampa Til Seminî ya Reqa, vera înan hêriş ame kerdene, pere û amûrê elektronîkî yê ke înan reyde bîyî zî ameyî destsernayene. Goreyê çimeyanê herêmîyan, xeylêk hemwelatîyê kurdî wexto ke Hesekê ra ver bi Efrînî kewtî rayîr, xeta kontrolî ya Tebqa de ameyî tepiştene û înan rê qiseyê xirabî ameyî vatene.

Nêzdîyê meydanê Ebasîyînî yê Şamî de ciwanêk ame remnayene, telefon û belgeyê ey ê kesayeyîye ameyî destserronayene. Dima ra ame kiştene û cenazaya ey dormeraya Muedemîye de veradayî. Taxa Neyrebî ya Helebî de zî netîceya yew pêkewtişî de 2 kesî ameyî kiştene û kesêk zî birîndar bi. Çolterê Teyîb El Falî yê Dêrazorî de grûbê çekdarî bi amancê kontrolkerdişê bîranê petrolî dayî pêro.

Bi yew droneye baregehê Amerîka yê Xirab Cîrî rê hêriş ame kerdene. Drone hetê sîstemê pawitişê hewayî ra ameye fînayene war. Zîyanê canî nêbîyî. Hêzanê hukmatê demkî yê Sûrîyeye bi 2 droneyan şaristanokê Mecdelî yê Siwêda bombebaran kerd. Netîceya bombebarankerdene de kesêk sivil birîndar bi. Hêzanê Pawitoxanê Nîştimanîyan ê Siwêda zî yew drone fînayê war.

Çolterê Tedmurî yê rojhelatê Humsî de herêma Tariq Şairî ra şivanêk teqayîşê mayîne de cuya xo kerde vîndî û heywanê ey (pezê ey) telef bîyî. Dewa Hiwêsî ya ke girêdayeyê Cebel El Belasî ya qezaya Eqrebîyatî yê rojhelatê Hama de ya, uca de zî weşatijêk teqayîşê mayîne ra birîndar bi. Dewa Xirbe Ebûdî ya Eyn Îsa de teqayîşê mayîne ra 2 kesî birîndar bîyî. Şaristanokê Xeşamî yê rojhelatê Dêrazorî de nêzdîyê xeta trênî de teqayîşê yew mayîne ra 2 domanî birîndar bîyî.