DBP’î rojbîyayîşê Abdullah Ocalanî pîroz kerd: 4ê Nîsane destpêkê demê newî yo

Rojbîyayîşê Rayberê Şarê Kurdî Abdullah Ocalanî yê 4ê Nîsane, Amare de bi festîvalêka coş û heycanî yena pîrozkerdene. Bi seyan kesî beşdarê festîvale bîyê. 

Partîya Herêmanê Demokratîkan (DBP) zî bi eşkeraya nuştêkî Rojbîyayîşê Rayberê Şarê Kurdî Abdullah Ocalanî yê 4ê Nîsane pîroz kerd.

Eşkeraya nuştekî ya DBP’î wina ya:

“Ma gandarbîyayîşê 4ê Nîsano ke Amara de berê cu yo newî akerd, fîraz kene.

4ê Nîsane têna şexsê kesayetêkî de nê, eynî waxt seba şarê kurdî û şaranê bindestan ê Rojhelatê Mîyanênî û dinya destpêkê demê newî yo.

Bi na roje hemberê feraseto ke erc û azadîya şaran înkar keno, gandarbîyayîşê ferasetê cuya azad û rûmetdare dest pêkerd.

Raştîya na roje no yo ke; bi rayraşîyayîşê Birêz Ocalanî rêzilanê bendeyîye yew bi yew dest pê şikîyayîşî kerd, berzeyê felsefeya cuya newe lete bi lete kewtî serê erdê Mezopotamya yê qedîmî. Bi no îrade û xobîyayîş; têkoşînê xobîyayîşî yê şarê kurdî ravurîya gêrayîşê azadîye û ewro seba mîlyonan bî rayraşîyayîşê aştî û rûmetdarîye

Seserra 21. de, binê sîya Şerê Dinya yê 3. de, hêzê neteweperestî hewl danê ke pergalê xo yê netewe-dewlete newî bikerê. Şer û alozîyê ke Rojhelatê Mîyanênî de ramînê, netîceyê nê hewldayîşî yê. Bi şerê ke qewimîyenê, bi krîzê ke xorîn benê; îradeyê şaran, ercê têduştî û azadîye yew bi yew yenê hedef girewtene. Bi komployêkê mîyanneteweyî tepiştişê Birêz Ocalanî zî helqaya tewr pîl a armancê modernîteya kapîtalîste bî.

Hemverê nê konseptî, tekane rayîrê xelase Neteweya Demokratîk a. Bêguman oyo ke no rayîr akerd û şaranê bindestan ê dinya rê berê cuyêka newe akerd zî Rayberê Şarê Kurdî Birêz Ocalan o. Fikr û xerîtaya rayîrî ya ey, hemverê sîyasetê înkar û îmha yê hêzanê serdestan, hemverê nêweşî û krîzanê pergalê kapîtalîzmî derman û çarenus o.

No yew zî nîşan dano ke; silamkerdişê 4ê Nîsane, pawitişê felsefeya cinîya azad o. Silamkerdiş yewîya demokratîke û îradeyê şaran o azad o. Wayîrvejîyayîşê na roja taybete, silamkerdişê çîroka efsûn a ke nêqedîna yo.

Îradeyo pîl o ke bi serrano Îmrali de ramîno; duştê tarîyîya tecrîdî de bî roştîya heqîqatê komelkî, duştê sîyasetê şerî de zî bî vengê "aştîya rûmetdare" yo hêzdar. Tîrêjê rojî yê ke 4ê Nîsane de serê erdê ma de pîl bîyî; warê demokratîkbîyayîşê cografya û azadîya ma de nameyê qerardarîyêka bêhempa yê.

Ewro şexsê Birêz Ocalanî de, hêvîyê têduştî, aştî û demokrasî tepişîyayî. No nêzdîbîyayîş bi çi şekl nêame qebûlkerdene. Bi no hawa wayîrvejîyayîşê Birêz Ocalanî; esas girewtiş û pawitişê ercanê merdimî û cuyêka rûmetdar o.

Na çarçewa de, eke ewro rojeve "Aştî û Komelo Demokratîk" o, ganî no proses şert û mercanê esasîyan ser o bêro awankerdene. Hewcedarîya nê awankerdişî zî desinde azadîya Birêz Ocalanî ya.

Nê esasî de, ma reyna veng danê îqtîdarê sîyasî; seba azadîya Rayberê Şarê Kurdî Abdullah Ocalanî cade gamê bierzîyê.

Bi na wesîle, şexsê Birêz Ocalanî de ma yewna gandarbîyayîşê 4ê Nîsane fîraz kenê û rojanê azadan de pêşwazîkerdişê sefîrê aştîye hêvî kenê.

Partîya Herêmanê Demokratîkan”