Dêrsim de panelê ziwanî: Verî keyeyê ma mektebê ma bî

Dêrsim de bi wesîleya Roşanê Ziwanê Kurdkî vizêr hetê DEM Partî û DBPyî ra panelêk ame organîzekerdene. Warê panelî de pankertê "Zonê ma sitera ma wa"  ame daliqnayene. Panelo ke moderatorîya ci rojnamegere Nuraye Atmaca kerd, Hemsereka Pêroyî ya DBPyî Çîgdeme Kiliçgun Uçar û Hemşaredara Bajarê Pîlî yê Mêrdînî Devrîme Demîra ke herinda ci de qeyûm ame cakerdene, sey qiseykerdoxan tewrê ci bîyî.

Çigdeme Kiliçgun Uçar ard ziwan ke ziwan û nasname yewbînan kenê temam û vat: ‘’Ge ge vanê mektebî çîn ê la verî keyeyê  ma mektebê ma bî. Wîna ziwan ameyêne pawitene û domanê ma zî ziwanê ma musayêne. 1935 de planê Şark Islahatî de vat ‘Kurdî wa ziwanê xo qisey mekerê.’ O wext kam ke ziwanê xo yê dayîke qiseykerdêne ya cezaya pereyî dayene ya zî eştêne zere. Dinya de çîyo winayên nêame vînayene. Nika çîyo winayên çîn o la ma zî ziwanê xo ra zaf kewtî dûrî.  Ma vanê ‘ziwanê ma de siyaset nêbeno, hîkaye nîna vatene, çîyêk nêbeno.’ Wina nîyo. Ez hîrê serrî yo ziwanê xo de siyaset kena. No hem pabesteyê têgêrayîşê azadîye yo hem zî pabesteyê Dêrsimî yo. Ez Dêrsim de şarmyena tirkî qisey bikerî." 

Çigdeme Kiliçgun Uçar wina dewam kerd: "Ma qey bi ziwanê xo yê dayîke qisey nêkenê ya zî sîyaset nêkenê? Dewlete û îqtîdar xora wazenê no ziwan binê herre de bimano. Ma têna vajê 'ma be xer' zî no ziwan binê herre ra vejîyeno. Partîyanê sîyasîyan de zaf îdarekarî est ê la çew bi ziwanê xo qisey nêkeno. Na berpirsîyarîye têna milê têgêrayîşê azadîye de menda."

Devrîme Demîr zî bale ante polîtîkayanê qedexe û zextî yê vera kurdkî ser û vat: ‘’Semedê pawitişê estbîyayîşê xo ganî ma ziwanê xo bipawê. Ziwanê ma ganî hinî bibo ziwanê perwerde û tîcaretî. Têna wina ziwan eşkeno aver şiro. Ganî ziwanê sîyasetê ma bibo kurdkî. Xeylê xebatê ke semedê averşîyayîşê kurdkî ameyî kerdene bi destê qeyûman ameyî astengkerdene.  Şaredarîyan de ganî zaf ziwanîye bibo."