Dewaya Dîrîlan de qeydê telefonî de Apro Dîrîl vano "Ez merdimê dewlet a"
Mîyanê tehqîqatê qetlê Şîmonî Dîrîl û Hurmuz Dîrîlî yê Şirnexî de Apro Dîrîl ke tepîşte yo, qeydê telefonî yê pêvînayîşanê ey demê dewa ameyî meydan. Qeydan de Dîrîlî bi hewayêko zelal vat ke o dewlete rê xebitîyêno.
Şîmonî Dîrîl û Hurmuz Dîrîl ê Suryanî 7ê çeleyî 2020î de dewa Mehleyî ya Şirnexî de vindî bîyî. 70 rojan ra pey meyîtê Şîmonî Dîrîlê ame dîyene la Hurmuz Dîrîl hema nêame dîyene.
Apro Dîrîl 2023î de seba na mesela ame tepîştene. Mîyanê tehqîqatê ke vera ey ramîyeno, qeydê telefonî yê aşmanê nîsane û gulane yê 2020î vejîyayî meydan.
Qeydanê telefonî de eşkera bî ke Apro Dîrîlî tay kesan reyde xebatêka muxbîrîye ya dewlete reyde ramita û bi îsraran qisey keno ke ey xelas bikerê. Tay kesê ke nameyê înan qeydan de vîyareno, hema nêameyî pê û îsrarê avûkan reyde zî nêameyî perskerdene.
Avûkatê keyeyê Dîrîlan vat ke mesele tena Apro Dîrîl ser o nêeşkena bêr nirxnayene û waşt ke tehqîqato zêde bibo. La heyetê mehkema nê waştişî qebul nêkerdî.
Goreyê qeydanê dosya, Apro Dîrîlî bi Nazdar Hamo û sucdarê bînî yê dewa Selman Oztunçî reyde xeylê reyî qisey kerdo. Heta nika mehkeme nêeşka biresa Nazdar Hamo.
"Ez merdimê dewlet a"
Qeydê pêvînayîşê telefonî yê 24ê nîsane 2020î yê mabênê Apro Dîrîlî û Nazdar Hamo:
Apro: Lajê mi heme nuşteyî wendî, bin de îmzaya mi dîya. Vat dewlete tu çîyê winayin nêkena, ez xora merdimê dewlet a.
Nazdar: Bi xeyrê Homayî dewlete heta peynî peyê ma de vindena, ti dewlete meroşe.
Mîyanê qiseykerdişê 26ê nîsane 2020î de Nazdar Hamo vat: "Mi ewro Kemalî reyde behsê to kerd. Kemalî vat heta peynî ma peyê ey de yê. Çend rojî verê mehkema, ma dozgerî reyde uca qisey kenê, ez Kemalî reyde qisey kena, ey reyde dozgerî reyde qisey kena, vajê peynîya mesela bîyarê."
Têkilîya Apro Dîrîlî ya bi dewlete reyde, qeydanê pêvînayîşanê ey yê Selman Oztunçî reyde zî vejîyayî meydan.
