DYA û Îranî nexşeraya 60 rojine ser o pêkerd
Goreyê eşkerayîya hempar a hukmatanê mabênkar (Pakîstan û Qatar), roniştîşê verên ê mabênê heyetê Îran û Amerîka de, seba ke nexşerayêka ya 60 rojine ser o pêkerdişêk bibo û şerê Rojhelatê Mîyanênî biqedînê, pêkerd. Na game seba aştîya herême sey eşkerayîyêka zaf pîl û tarîxî ameye vînayene.
Heyetanê DYA û Îranî, roniştişê ewilin ê muzakereyan de ke roja yewşeme herêma Burgenstock a Swîsre de ameybî rayraberdiş, averşîyayîşêko zaf pîl û muhîm bidest vist. Eşkerayîya hempar a hukmatanê mabênkar Pakîstan û Qatarî de ame dîyarkerdiş ke her di hetan zî “averşîyayîşê bicesaret” bidest vistê û seba qedîyayîşê şerî Rojhelatê Mîyanênî pêkerdo.
Eşkerayî de ame dîyarkerdiş ke heyetê DYA û Îranî do rojanê ameyoxan de Swîsre de muzakereyanê teknîkîyan bidomnê. Babetanê tewr pîl û muhîm ê nê kombîyayîşan ra yew zî, Neqebê Hurmuzî bi.
Goreyê zanayîşanê mabênkaran, seba garantîkerdişê ewleyîya vîyarnayîşê keştîyanê bazirganîye û bi amancê astengkerdişê şaşfemkerdişan do mabênê Îran û DYA de xetêka têkilîye ya rasterast bêra awankerdene.
Seba Lubnanî yewîneya rayberî ya şerî
Her di hetan seba pawîtişê adirbestê Lubnanî de zî awankerdişê “yewîneya rayberîya şerî” de pêkerdo.
Eşkerayî de ame dîyarkerdiş ke na mekanîzmaya ke nameyê ci vîyart wezîfedarîya xo pê tewrbîyayîşê Îran, DYA, Lubnan û welatanê mabênkaran do bêra rayraberdene. Ame vatene ke wezîfeyo esasî yê na mekanîzma, do vindarnayîşê operasyonanê leşkerî yê Lubnanî de û astengkerdişê binpaykerdişê adirbestî bibo.
