‘Ez Alî Haydaro Pilomurij’

Muhîttîn Altun

Ez Alî Haydaro Pilomurij

Pîyê mi seyîdan kişt xeylî zamanan ra ver

Seba astorêka kimêti

Yew lingi xirxalini

Yew maya mi mendi, yew zî ez

Nameyê maya mi Gulistan 

La koyanê ma di Kila Gulê vanê maya mi ra

Maya mi Gulê nameyê şaristanî ser o

Pilomuri teyna dîya yew dolimi

Çi ra bi, seba çinayî bi mi xo vîr a kerd

La xalê mi reyra ameybî Pilomure

 

Dayika mi Gulê

Zana cuwalan bimuna

Zana wenîşa astoran

Dia kena pê eşqê Îmam Caferî

Nîyaz dana Duzgin Babayî

Ek lacê ci Alî Haydar xo bixelesno

Wa nuştiş û wendiş bimuso

Wa ziwan bimuso

Wa bikewo çêberê dewlete

Dayika mi Gulê zana tifing bierza

Zana dia bikera

Îmam Huseynî, Seyît Rizayî zana

Zana darba guleyî pê ruwenî dax bikera

Zana lacê xo dim a biberma

Zana dayika mi Gulê

Tirkî nêzana, ziwan nêzana

 

Nîyazê maya mi Gulê qabul bîyo

Ez hewt serreya xo di reyaya ê koyan ra

Mi verî Pilomuri di wendo

Dim a zî Xarpêt di wendo

Sayeyê Elîyê Nalbendî di

Mektebo verîn, mîyanên

Biney rew, biney erey

Mi xo lîse di dîyo

Sarewişkeya mi ra bi nê ki yewna sebeb ra bi nêzana, hinî se bi bi

Ez keyeyê Elîyê Nalbendî ra ameya teberkerdiş

 

Hîrê serrê lîse Alî Haydarê Pilomurîjî rê 

Zor ameyê sey rayîranê koyan

Tira pey Ankara

 

Mi sewlî boye kerdê

Mi rojnameyî rotê

Mi hamaleyi kerdi Halê Ankara di

No mabeyn di mi fakulte dewam kerdi

Sersefîl

 

Çi gure mi dest a ame mi kerd

Bes ki miradê maya mi biqedîyo

La mi Pilomuri kerde xo vîr

Mi maya xo kerdi xo vîr

Mi ziwanê ê koyan kerd xo vîr

 

Tam hewt serrî qedîyaybî

ki mi maya xo nêdîbî

Maya mi Gulê nîyaz dabi Duzgin Babayî

Ek lacê ci Alî Haydar biwano

Yew kêfweşîya xerîbe zerrîya mi ser geyrayi

Mi va miradê dayika ame ca

Mi waşt yew sare ê koyan ro bida

Yew sare ê dewan ro

Û dayika xo ya pîre ro bida

 

Alî Haydaro Pilomurij

Wendox û nûştox

Zano qirewati girê bido

Zano bulvar di bigeyro

Mezunê mektebê mîyanênî

Mezunê lîse û fakulteya huquqî

Ez Alî Haydaro Pilomurij

 

Zerrîya mi biwaza ez bena hakim

Nameyê milleta Tirkan ser o

Qararan dana anegorebê qanunan

Ez eşkena xo ra bida cubeyê sîyayî

yê giranesîmînî

Zerrîya mi biwaza ez bena dozger

bena awuqat

 

Ez Alî Haydaro Pilomirij

Ez lacê Dayika Gulê Alî Haydar a

Destê xo bidê mi koyê ma

Destê xo bidê Xarpêt, Mamekî, Çolîg

Elî Haydaro huquqnas ha yeno

Dayika Gulê tedarikê xo veyni,

nano ruwenin hadre bike

Alî Haydaro Pilomurij ha yeno

Lacê to ha yeno Dakila Gulê

 

Mi yew telgraf da Elîyê Nalbendî

Wa biweseyno, mizgîne bido dayika mi Gulê

Bido qewm û merdimandê mi

Wa biweseyno tipê şarê ma ser

 

Der û cîranî, qij û pîlî

Banê keyeyî ser o bîyê kûrri

Cinîyan yew hayleme pira na

Sereyê haylemeyî dayika mi ancena

Bermayî, bermayî, bermayî…

 

Çiqiran girewto rîyê maya mi

Çiqirîyayî destê maya mi

Mi destê maya xo yo çiqirîyaye

yê damarkewe miçi kerd

Mi maya xo Gulê ra va:

-Maya mi ti senîn a, baş a?

Maya mi şaş şaş qaytê rîyê mi kerd

Ez rîyê maya xo ra ewnîyaya

Ma wirdinî ra ne ne hes vecîya ne bes

Ez Alî Haydaro Pilomurij

Ez namzedê hakîmêye Elî Haydar

Ez namzedê dozgerêye Elî Haydar

Ez namzetê awuqatêye Elî Haydar

Mi huquqê Roma qedîna

Mutum, demosîtum, kommadatum, pagnus

Zîlyetîye, vazulyetîye, mururûzaman

Temerrut, heqê şîfa, heqê îrtîfaq

 

Serrî mîyan ra vîyarî zî

Yew tek mi vîr ra nêşina

Ez lacê Dayika Gulê Alî Haydar

Mi ziwanê dayika xo kerdo xo vir a

Dayika mi ziwanê mi nêzana

Sey di bêzar û bêziwanan

Ma bel bel ewnîyenê yewbînan ra

Silam şima rê

Şimayê ke may û lacî cî ser vistê

Silam şima rê…

Na şîîra Şemsî Bellî ya. Serranê 1960-70’yan de nuşto. Kitabê ci yo bi nameyê “Anayasso/ Dogu Anadolu Şîîrlerî” de ca gîno. Estanika Ali Haydarê Pilomurijî eyro bîya estanika zaf kurdan. Bellî hima 50- 60 serran ra ver trajedîya kurdan dîya, bale anta talukeyê vindîbîyişê ziwanî ser.