Li Stenbolê ji bo kurdî qadeke nû: Zimanxane

Li Stenbolê komeleyeke nû ji bo pêşvebirin û hînkirina zimanê kurdî tê avakirin. Komeleya Lêkolîn û Pêşxistina Ziman û Çanda Kurdî (Zimanxane) dê di 21ê hezîranê de li navçeya Umraniyeyê vebe. Li komeleyê dê du dersxane hebein; yek ji bo mezinan û yek jî ji bo zarokan. Di destpêkê de, ders dê bi zaravayê kurmancî yê kurdî werin dayîn û di pêşerojê de dê bi zaravayên din jî werin dayîn. Ji bilî hînkirina kurdî, komele armanc dike ku çalakiyên çandî û hunerî jî li dar bixe. Ew ê her wiha çalakiyan wekî nîşandana fîlman, civînên nivîskaran û îmzekirina pirtûkan li dar bixe.

Armancên komeleyê 

Ji rêveberên komeleyê Hecî Erbek got ku wan Zimanxane bi hewldaneke kolektîf ava kiriye û piştgirê wan ê herî mezin gel e. Erbek bangên rewşenbîrê kurd Celadet Alî Bedirxan ên ji bo parastina zimanê kurdî bi bîr xist û got: "Celadet Bedirxan dibêje, 'Xizmetê ji zimanê kurdî re bikin. Ger derfeta we tune be, qîmetê bidin kesên ku derfet hene û wan binirxînin.' Gelê me der barê ziman de xwedî hesasiyeteke mezin e. Em jî hewl didin ku di vî warî de xizmetê bikin."

Erbek destnîşan kir ku divê zimanê kurdî bibe zimanê perwerdehiyê û got: "Li ser ziman zilm û zordarî heye. Lêbelê, divê em rexneyên xwe jî bikin; kurdî ne zimanê perwerdehiyê ye, di vî warî de zehmetî hene û ev jî asîmîlasyon e. Lê niha em xwe jî asîmîle dikin. Ji ber vê yekê, armanca me ya herî mezin ew e ku saziyên ziman û lêkolînên ziman di navenda qada siyasî de cih bigirin."

Erbek diyar kir ku Zimanxane ne tenê dê bibe saziyek ziman, di heman demê de armanc dike ku li kêleka çalakiyên ziman çalakiyên çandî û hunerî jî pêk bîne. Wî destnîşan kir ku ew ê pêşandanên fîlman, civînên nivîskaran û îmzekirina pirtûkan û her wiha çalakiyên di rojên taybetî yên bi zimanê dayikê û kurdî ve girêdayî de organîze bikin.

Vexwendin

Erbek got: "Kurd 50 sal in ji bo zimanê xwe têkoşîneke bênavber dimeşînin. Lêbelê, ew hîn bi tevahî negihîştine hebûna xwe. Yek ji sedemên vê yekê kêmasiyên di warê ziman de ne. Ji ber vê yekê, em di vî warî de hêvîdar û xwedî azwer in. Xwendekarên me dê hebin, em ê wan perwerde bikin û dû re ew ê bibin mamoste. Em ê bi ziman û nasnameya xwe beşdarî vê têkoşînê bibin."

Erbek hemû rêxistinên girseyî yên demokratîk û beşên civakê vexwend merasîma vekirinê ya di 21ê hezîranê de.