Ganî kurdî bêstatubîyayîşî qebul nêkerê

Verê peymana mabênê hêrdû hetan de Amerîka, Yewîya Ewropa û zaf dewletanê bînan hişyarî da Kolonî ke heme heqanê şarê kurdî yê xozayî qanûnê bingeyî de nas bikero. Dima Amerîka û zaf hêzanê bînan garantorîya peymana mabênê hukmatê Sûrîye û Hêzanê Kurdan (HSD) de kerde. Goreyê peymana ke ameya viraştene, hêzê kurdan çekanê xo nêdanê hukmatî, la do sey tumenî entegreyê hêzanê Sûrîye bibê. Reyna goreyê peymane, çend hebanê ke sey temsîlkarê hukmatî yê ra vêşêr, çeteyê Kolonî nîyenê bajaranê binê kontrolê hêzanê kurdan; yanî ancî hêzê kurdan do bi xo şar û bajaranê xo bipawê. Raşta ci, peymana ke mabênê hêrdû hetan de virazîyaya zaf hîra ya û hema zî dîdarê pîyameyîşî yê mabênê hêrdû hetan de dewam kenê.

Semedê ke ma muhtewaya peymane baş nêzanenê, ma nêeşkenê vajê ke hêzê kurdan bin ra teslîmê Kolonî bîyê û bêstatubîyayîş qebul kerdo, la ma nêeşkenê vajê ke kurdan peymanêka hole viraşta û statuyê xo zî bi duşmenî dayo qebulkerdiş. Sey ma pêro zî zanenê, Amerîka û Îsraîl xo şerê Îranî rê hedre kenê û bêguman nê şerî de hewcehîya înan bi çeteyanê Kolonî zî esta. Ena ray beno ke aye ra Amerîka nêwaşt ke kurdî nika bibê wayîrê statuyî. Çimkî eke nika statu bidîyêne kurdan, beno ke çeteyî û wayîrê înan ê ke estbîyayîşê xo çinbîyayîşê kurdan ser o awan kerdo, şerê Îranî de hetê Amerîka nêkerê. Yanî nika Rojhelato Mîyanên têmîyan o û dewletê serdestê dinya hesab û plananê zaf pîlan kenê. Aye ra beno ke nika peymana kurdan seba statuyî gamek bo, beno serdestan seba hesabanê xo nêwaşt kurdî hema ca de bibê wayîrê statuyî.

Ancî rewşa Efrîn, Girê Spî û Serêkanîyê do se biba ma hema zî nêzanenê. Goreyê peymane ganî koçberê ê şaristanan ageyrê cayanê xo. Reyna goreyê tayê çiman, peymana ke mabênê kurdan û hukmatê Sûrîye de virazîyaya seba Efrîn û Serêkanîyê zî derbasdar a, yanî artêşa Kolonî nêkewena ê cayan zî. Çarçewaya peymane de ganî dewleta Tirkîya hêzanê xo cayanê sey Efrîn, Serêkanîye û Girê Spî yê ke dagîr kerdê, uca ra bianco. La sey ma pêro zî zanenê, eke dewleta Tirkîya cayêk dagîr bikero êdî uca ra nêvejîyena. Sey pîlanê ma zî vato "Wext dermanê her çîyî yo", bêguman do rocanê bêrenan de her çî hîna baş zelal bibo.

Peymane ra dima temsîlkaranê zaf dewletanê sey Amerîka, Fransa û êb. razîbîyayîşê xo vat û seba pêameyîşî hêrdû hetî zî (kurdî û hukmatê Sûrîye) tebrîk kerdî. Reyna tayê partî, hizb û sîyasetmedarê kurdan zî paştgirîya xo seba peymane vate. Reyna şar û hukmatê ma yê Başûrê Kurdistanî nê rocanê tengan de resayî hewarê şarê ma yê Rocawanê Kurdistanî û bi ruhê seferberîye paştî daye înan.

Roje, Roja Yewîye Ya

Şarê kurdî heme cayê dinya de vera galeyanê çeteyan bîyo yew, helwest û reaksîyonêkê huşkî nîşan dayî. Çi kurdê ma yê welatî û çi zî yê dîaspora û çi zî yê cayanê bînan ê dinya de ciwîyenê, seba ke paştgîrîya şarê ma yê Rocawanê Kurdistanî bikerê, bi alayanê Kurdistanî, bi sloganê "Biciwîyo Kurdistan, Biciwîyo wayûbirayîya Kurdan, Rocawan o, Rojhelat o, Kurdistan yew welat o" vejîyayî qadan û vengê xo berz kerd. Yanî nê galeyanê duşmenan kurdî pêro kerdî yew û mîyanê şarê ma de zî hişmendîyêka neteweyîye viraşte.

Yew vateyê ma yê verênan esto, vanê: "Dostê merdimî roja tenge de kifş beno." Raşta ci ganî ma vajê ke serek û rayber birêz Mesûd Barzanîyî çi hetê tibî, çi yê werdî û çi zî yê merdimîye de texsîr nêkerd û heme derfetê Başûrê Kurdistanî kerdî xizmeta şarê ma yê Rocawanê Kurdistanî û wina hetê dîplomasîye de zî heta ke adirbest virazîya nêvinderd. Reyna zaf hunermend, sîyasetkar û namdarê kurdan zî beşdarê na seferberîye bîyî û ameyî Rocawanê Kurdistanî û paştî daye xoverdayîşê şar û şerwanan.

Raşta ci wêneyanê yewîya kurdan hêz dayo ma û ma zaf pê zerrîweş bîyî, çimkî gama ke şar, sîyaset, helwest û armancê ma yew bê ma bihêz ê û gama ke ma bihêz bîyî duşmenî zî do ma ra bitersê. La wa yewîya şar û sîyaseta ma ya kurdî tenya rocanê tengan de nê, seba xilazîya welatê xo rocanê hîrayan de zî tifaqa xo viraştêne, qet nêbo nê bobelatî nêameyêne serê şarê ma. Wexto ke Şoreşa Rocawanê Kurdistanî dest pêkerd, eke ma îdeolojîk nê la neteweyî bifikirîyayêne beno ke ewro statuyêkê ma zî bibîyêne.

Nika ra Dima Tenya Biciwîyo wayûbirayîya Kurdan

Gama çeteyanê Kolonî yê ereban bi paştîya hukmatê Tirkîya kurdî qetl kerdêne, şarê tirk û ereban zî bi awayêkê eşkerayî zerrîweşî û razîbîyayîşê xo vatêne. Bi taybetî zî şarê erebî yê ke hêzanê kurdan bi serran ê her çîyê xirabî ra pawitî û seba emnîyetê înan bi hezaran şehîdî dayî, gama ke çeteyanê Kolonî galeyê kurdan kerd, ê ereban zî pey ra xençere daye paştîya kurdan. Xora eke înan pey ra xençere nêdayêne, kurdan çeteyan nêeşkayêne vîncewek hard zî kurdan rê bigirewtêne. Raşta ci, nika ra dima wayûbirayîya şaran seba ma kirdan xapînayîş o, çimkî ê xençere zerrîya ma vêşnaye û ma çi rey no xîyanetê xo vîr ra nêkenê. Helbet hêzê ma yê leşkerî (HSD) verê her çîyî hêzêkê însanî û medenî yo la înan nê derfetê zernênî/altûnî yê ke hêzê ma dayî înan vîndî kerdî, coka zî ganî ma fek dewaya "wayûbirayîya şaran" ra verdê. Xora heta nika çi xeyrê wayûbirayîya şaran nêresayo ma; heta nika ma kerdêne înan zî werdêne. Ena ray ganî ma nika ra dima seba yewîya kurdan cehd bikerê û eke ma bêrê kiştene zî qe nêbo wa ma seba azadîya şar û welatê xo bêrê kiştene.

Eke bawerîya sîyaseta ma bi dewaya şarê ma biba, ez bawer kena şarê kurdî çi rey înan tenya nêverdano; yanî ma bi artêş, şar û rêxistina xo besê xo yê, hewcehîya ma bi birayîya sewbîna şaran çin a.

Wa her kes baş bizano nika ra dima çîyêk sey verê cû nêbeno û şarê kurdî zî êdî sey verê cû nîyo û cuyêka bêstatu zî çi rey qebul nêkeno. Eke ewro hêzê kurdan xo fesih bikero û nêmano, ancî zî şarê ma yê Rocawanê Kurdistanî nika ra dima qebul nêkeno ke çeteyî bêrê welatê înan. Xora şarê ma pancês serrî yo ke hewt serran ra heta hewtay serran xo şerê mendiş û nêmendişî kenê û nê cengî de seba azadîya welatê xo bedelê zaf pîlî dayê. Coka nika ra dima seba ke bibo wayîrê statuyî çi hewce bikero bêguman şarê kurdî do bikero, la çi rey bêstatubîyayîşî qebul nêkeno.