Hesen Zîrek: Efsaneyê muzîkê kurdkîyo bêmerg
Hesen Zîrek sey Şakiroyî, hem qeydê edebîyatê fekkî pawit, hem zî vîrê kurdan bi awazê xo newe ra zindî kerd. Heme herêmanê Kurdîstanî de; Başûr, Bakur, Rojava û Rojhilat de, tewr milet bi vengê Zîrekî mîyanê yew asoya kulturel de beno yew
Muzîk û edebîyatê şarê ma de, tayê nameyî estê ke se serrî zî bivîyarê, qet nêvîrîyênê û sey vîrdîyêka bêmerge mîyanê zerrîya miletî de cuwenê. Nê nameyan ra yew zî, efsaneyê muzîkê kurdkî, hunermend û deyîrbazo pîl Hesen Zîrek o. Hesen Zîrek, 26ê Hezîrana serra 1972yî de dinyaya xo bedilnaye û şi rehmîya xo. Ewro serrgêra wefatê nê hunermendê erjayeyî ya. Zîrek, hem hetê vengî ra hem zî hetê vate û bestekî ra edebîyatê Soranî û muzîkê kurdkî de xeta tewr berze de ca gêno. O, pê kelamanê xo, derd, kul, eşq û hesreta şarê xo arda ziwan û bîyo vengê welatê xo.
Hesen Zîrek, şaristanê Bokanî yê Rojhilatê Kurdîstanî de ameyo dinya. Cuyeya ey zaf bi zehmetî, feqîrîye û xizanîye vîyarte. Bêwelatîye û zextê sîyasîyî yê rejîman, qet pêsîra ey veranedaye. Seba ke ey tim bi kurdkî deyîrî vatêne û wayîrê kultur û hunerê xo vejîyayêne, hem Îran de hem zî Iraq de tewir bi tewir zor û zexmetîyî dîyî. Ey hema-hema heme emrê xo surgun, qedexe, xizanî û hepisxaneyan de, raverî û peyserî vîyarna. La nê şert û mercê giranî yê cuye, o qet hunerê ey ra û xizmetê ziwanê ey ra dûrî nêvist. Derd û kul çiqas bîyî giranî, vengê ey hîna zêde kerd roşnî û berz.
Hunerê ey û "Ey Nîştiman"
Vengê ey û qabiliyetê ey ê bestekarîye, xezîneyêko bêemsal verda dima. Goreyê tayê çimeyan, texmînen 1500 ra zêdêr eser û deyîrê ey estê. Nê eseranê ey mîyan de deyîra "Ey Nîştiman", sey marşêka neteweyî, pêro sînoran ra vîyarte û mîyanê heme kurdan de bîyî vila.
Zîrek tenya yew deyîrbaz nêbî; eynî wext de yew şaîro zîrek bî ke deyîrê xo bi xo nuştêne û awazê înan viraştêne. Eseranê ey de eşq, evîn, welatperwerîye, wesfê tebîatî û bindestîya kurdan ameyî neхşkerdiş. Zîrek, beşa soranî de muzîkê kurdkîyo klasîk ra derbazbîyayîşê muzîkê modernî de rolêko pîl û tarîxî kay kerd. Ey melodîyê folklorîkî kerdî modern û resnayî qelbanê pêro dinya.
Edebîyatê kurdkî de cayê ey û Şakiro
Eke ma biwazê qîmetê hunerê ey rind fam bikerê, ma eşkenê vajê ke; tesîro ke Şakiro kulturê dengbêjîye de viraşto, Hesen Zîrekî zî o tesîr muzîkê kurdkîyo modern û soranî de viraşto. Vengê Şakiroyî senî ke kilamê kurmancî kerdî bêmerg, vengê Zîrekî zî bi na qayde şîîr û awazê soranî kerdî zerreyê miletî de nexş.
Hesen Zîrek sey Şakiroyî, hem qeydê edebîyatê fekkî pawit, hem zî vîrê kurdan bi awazê xo newe ra zindî kerd. Heme herêmanê Kurdîstanî de; Başûr, Bakur, Rojava û Rojhilat de, tewr milet bi vengê Zîrekî mîyanê yew asoya kulturel de beno yew.
Ewro, serrgêra wefatê nê pîrê muzîkê kurdkî de, nuştox, rewşenbîr û hunermendê kurdî bi hûrmet û rehma pîlî ey yad kenê. Zîrek, cuye xo de çiqas feqîr bî, çiqas bêkes û xerîb bî zî; mergê xo ra dima bi mîlyonan insanan rê bîyo heval, bîyo qehremanê kulturî. Vengê ey qet nêbirîyayo û do nêbirîyo zî. Hesen Zîrek, mîyanê tarîxê hunerê ma de, sey yew estareyêkê çim-roşnî, do heta bêpeynî asîmanê welatî de şewq bido û zerrîya neslanê neweyan de bicuwo.
