Seba 'Mîtîngê Azadîye' yê Amedî zaf şaristan ra vengdayîşî
Verê mîtîngê "Bi Rayberîya Azade ver bi Komelê Demokratîkî" ke roja yewşemeyî Amed de yeno viraştene, Amed, Xarpêt, Çewlîg, Êlih û Sêrtî de bi parekerdişê broşûran, xebata standan û pêdîyayîşanê şarî vengdayîşê beşdarbîyayîşî ameyî kerdene.
Têgêrayîşê Cinîyan ê Azadan (TJA), Partîya Herêmanê Demokratîkan (DBP) û Partîya Seypêyî û Demokrasî ya Şaran (DEM Partî), bi talebê azadîya Rayberê Şarê Kurdî Abdullah Ocalan, 28ê hezîrane roja yewşemeyî Meydanê Îstasyonî yê Amedî de mîtîngê "Bi Rayberîya Azade ver bi Komelê Demokratîkî" virazenê; hazirî dewam kenê.
Verê mîtîngê ke saete 17.00 de dest pêkeno, 17 qezayanê Amedî de taxê teberî zî tede broşûrî ameyî parekerdene, keye û cayê karî ameyî zîyaretkerdene û park û qeweyan de pêdîyayîşê şarî ameyî viraştene. Xebatan de hemwelatî dawetê mîtîngî bîyî.
Xarpêt de Rêxistina Şaristanî ya DEM Partî û Meclîsê Ciwanan zî verê banê şaristanî de eşkerayî daye û vengdayîşê beşdarbîyayîşê mîtîngê Amedî kerd. Badê eşkerayîye şaristanî de broşûrî ameyî vilakerdene.
Çewlîg de zî hetê TJA, DBP û DEM Partî ra merkezê şaristanî de standî ameyî ronayene; bi zîyaretanê ke qeza û dewan de ameyî ramitene, muhîmîya mîtîngî ame vatene. Êlih û Sêrt de zî sîyasetmedaran û temsîlkaranê dezgehan eşkerayîyanê xo de hemwelatî dawetê Meydanê mîtîngê Amedî kerd.
Vengdayîşan de ame vîrardene ke seba çareserîya demokratîke ya meseleya kurdan ganî şertê xebate û têkilîye yê Rayberê Şarê Kurdî Abdullah Ocalanî baştêr bibê û mîtîng de vengdayîşê pêdîyayîşî bi waştişê aştî û azadîye ame newekerdene.
