Şaredarîya Sûrî ra gamêka zafziwanîye: Seba xebatkaran kursê kurdkî dest pêkerd
Şaredarîya Sûrî çarçiweya xebatanê xo yê zafziwanîyan de, seba xebatkaranê şaredarîye kursê wendiş û nuştişî yê zaravayanê kirmanckî û kurmancî da destpêkerdene. Kurso ke rastê eleqeyêko pîl yeno, do averberdişê xizmetanê şaredarîye yê zafziwanîyan de rolêko girîng kay bikero.
Çarçiweya xebatanê zafziwanîyan yê Şaredarîya Sûrî de, seba xebatkaranê şaredarîye kursê wendiş û nuştişî yê bi ziwanê kurdkî dest pêkerd. Kurs, salona meclîsî ya bînaya şaredarîye de yeno kerdene. Kursê ziwanî yê seba xebatkaranê şaredarîye, do bi 2 zaravayanê kurdkî (kurmancî û kirmanckî) dewam bikerê û heme xebatkarê şaredarîye yê ke wazenê wendiş û nuştişê kurdkî bimûsê, eşkenê nê kursan de ca bigîrê.
Yeno pawitene ke nê kursê ziwanî yê ke rastê tewrbîyayîş û eleqeyêko pîl yenê, averberdişê xizmetanê zafziwanîyan yê şaredarîye de rolêko pîl kay bikerê.
