Îran ra Çîn û Rûsya rê Qirika Hurmuzî de îmtîyazê taybetî
Serekê Asayîşê Neteweyî yê Parlamentoyê Îranî Îbrahîm Azîzîyî da zanayene ke Qirika Hurmuzî de seba hembaranê stratejîkan ê zey Çîn û Rûsya do şertê taybetî bêrê pêşkêşkerdene. Azîzîyî reyna dîyar kerd ke babeta uranyumê zengînkerdeyî, pêvînayîşanê dîplomatîkan ê bi Pakîstan û Amerîka de nîna rojdem.
Serekê Asayîşê Neteweyî û Komîteya Polîtîkayanê Teberî yê Parlamentoyê Îranî Îbrahîm Azîzî, derheqê polîtîkayanê teberî û pêvînayîşanê dîplomatîkan de ajansê Sputnîkî rê qisey kerd.
"Dewletê stratejîkî do muameleyê taybetî bivînê"
Azîzîyî bala xo daye serê stratejîya Îranî ya Qirika Hurmuzî û vat: "Dewletê stratejîkî yê zey Çîn û Rûsya ke têkilîya înan bi Qirika Hurmuzî est a, do tîya de muameleyêko taybet bivînê. Nê dewletî vîyartişê Qirika Hurmuzî ra eşkenê şertanê taybetan û destdayîyan ra feyde bikerê."
Babeta Uranyumî rojdem de nîya
Qiseykerdişê xo de Îbrahîm Azîzîyî cewab da îdîayanê derheqê bernameyê nukleerî zî. Azîzîyî dîyar kerd ke babeta uranyumî rojeva dîplomasîye de nîya û wina vat:
"Merhaleya îstîşareyan û pêvînayîşê heyetan ê mabênê Îran û Pakîstanî de babeta vejîyayîşê uranyumê zengînkerdeyî qet nîno destgirewtene. Heman wextî de, pêvînayîş û têkilîyanê bi amerîkayijan de zî na babete qet nîna rojdem."
