Kobanî rê paştdayîş; wazîfeyê ma yê wayûbirayîye yo

Kobanî, tarîxê ma de seba şarê ma bîya sembolê xoverdayîş û wayûbirayîye. La nê demanê peyênan de, şarê Kobanî zaf zehmetîyî antî û perîşan bîyî. Xirabîya şerî, bêsitirîye, vêşanîye û nêweşîyî şarê Kobanî kerdî muhtecê hetkarîye. Nika, wextê paştdayîşî û wayûbirayîye yo. 

Sînorî eşkenê mabênê welatan de bibê asteng, la qet yew sînor nêeşkeno mabênê zerreyanê ma de bibo asteng. Kurdê ke Tirkîya de (Vakur de) ciwîyenê, ganî wa û wayûbirayanê xo yê Kobanî vîr a nêkerê û destê xo yê ardimî dergê înan bikerê.

Ewro, Tirkîya de zaf dezgehê sîvîlî (STK) qey Kobanî kampanyayê hetkarîye dayê destpêkerdene. Nê kampanyayî, seba şarê ma yê ke uca de zehmetîye ancenê, zey yew hêvî û derman ê. Dezgehê sîvîlî wazenê ke xurek, kinc, derman, awe û îhtîyacîyanê bînan biresnê şarê Kobanî. 

Ma zanê ke, qet asan nîyo ke merdim keyeyê xo û welatê xo de muhtecê yewna kesî bibo. Coka, ma ganî bi hestêka pîl a merdimîye û wayûbirayîye paştî bidê nê dezgehan. 

Nê dezgehî, benê pirdê mabênê ma û Kobanî. Her kinc, her dermanê ke ma danê, seba yew domanê Kobanî, seba yew pîr yan zî dadîya Kobanî beno weşîye û stargeh.

Aşma Remezanî de hetkarî 

Dînê ma û kulturê ma de, ardimkerdiş û embazîye zaf muhîm ê. Taybetî aşma Remezanî de yan zî wextanê bimbarekan de, dayîşê zekat û fitreyî wazîfeyêko dînî yo. Îslam de yeno vatene ke merdim ganî zekat û fitreyê xo bido kesê ke tewr zêde muhtec ê. Ewro, kam şarê Kobanî ra zêdêr muhtec o? Domanê ke bêmandêgeh ê, kal û pîrê ke derman nêvînenê, dadîyê ke nêeşkenê şit bidê tutanê xo... Eke ma fitir û zekatê xo bidê wa û wayûbirayanê xo yê Kobanî, ma hem wazîfeyê xo yê dînî yê verê Homayî anê ca, hem zî wazîfeyê xo yê wayûbirayîye anê ca. Pêdayîşê fitir û zekatî, mal û milkê merdimî pak beno û bereket keweno mîyanê ci. Xêrê ke şonê Kobanî, do bibê dermanê birînanê înan.

Fitir û zekatê xo bidê wayûbirayanê xo 

Kurdê Vakurî û Kurdê Rojawanî, zey goşt û neynikî yê. Ma nêeşkenê derdê înan rê bêveng bimanê yan zî xo kerr û lal bikerê. Waxto ke uca de yew doman vêşan o, ma nêeşkenê tîya de bi rehetî şamî biwerê. Waxto ke uca de merdimî sermayî ra lerzenê, ma nêeşkenê tîya de cayê xo yê germî de rehet rakewê. Şarê Kobanî wazeno keyeyê xo, banê xo û welatê xo raşt bikero û weşîya xo dewam bikero. Ardimê ma eşkeno bibo sitareyê înan. Pêro kurdî, çi dewlemend çi feqîr, ganî goreyê quwetê xo ardim bikerê. Keso ke eşkeno, wa zaf bido; keso ke nêeşkeno, wa tay bido, la wa qet nêbo, bi duayanê xo paştî bido înan.

Kobanî, rûmetê ma yo 

Bêrên, ma pêro pîya destê xo dergê Kobanî bikerê. Kampanyayanê dezgehanê sîvîlan (STK) rê paştî bidin. Zekat û fitreyê xo, sedeqe û xêrê xo biresnê şarê Kobanî. Ma xo vîr a nêkerin ke; çi tiştê ke ma danê wayûbirayanê xo, o yeno sandoqê ma yê axretî. Homa xêr û xeyratê şima pêroyî qebul bikero û biko xêrê birayîye û aştîye. Wa Kobanî bi ardimê ma, bi paştdayîşê şarê ma reyna awan bibo û domanê Kobanî reyna bi şahîye bikewê. Ardimê şima, do tarîx de zey nuşteyêkê birayîye bimano. Wayîrvejîyayîşê Kobanî, wayîrvejîyayîşê rûmetê ma yo.