Kurdistanî li Strasbourgê ji bo "Mafê Hêviyê" civiyan
Di dema ku Komîteya Wezîran a Konseya Ewropayê di navbera 9 heta 11ê Hezîranê de civînên xwe yên mafên mirovan (DH) didomîne, bi sedan Kurdistanî û hevalên wan ji gelek welatên Ewropayê li pêşiya Konseya Ewropayê li Strasbourgê civiyan. Armanca sereke ya vê çalakiyê daxwaza pêkanîna “Mafê Hêviyê” ji bo Rêberê Gelê Kurd Abdullah Öcalan û bidawîkirina şert û mercên tecrîdê bû.
Li çalakiyê Kurdistanî ji Almanya, Fransa, Belçîka, Hollanda, Swîsre û gelek welatên din ên Ewropayê beşdar bûn. Bi bangewaziya Tevgera Jinên Kurd a Ewropayê (TJK-E) û Kongreya Civaka Demokratîk a Kurd a Ewropayê (KCDK-E) hat organîzekirin.
Di daxuyaniya çapemeniyê de ku bi zimanên îngilîzî, kurdî û tirkî hate xwendin, hat diyarkirin ku Konseya Ewropayê divê berpirsiyariya xwe ya di warê parastina mafên mirovan de pêk bîne û ji bo bicihanîna biryarên Dadgeha Mafên Mirovan a Ewropayê gavên konkret bavêje.
Axêveran di gotinên xwe de bal kişandin ser girîngiya rakirina tecrîda li ser Abdullah Öcalan û pêkanîna Mafê Hêviyê. Wan diyar kir ku vebûna rêyên diyaloqê û çareseriya demokratîk ji bo çareserkirina pirsgirêka Kurd gelek girîng e. Di heman demê de bang li saziyên navneteweyî hat kirin ku li hember vê pirsgirêkê bêdeng nemînin û berpirsiyariya xwe bicîh bînin.
Di çarçoveya çalakiyan de ku sê rojan bidomin, nûnerên civaka sivîl, parêzvanên mafên mirovan û gelek kesayetiyên siyasî jî bi daxuyaniyên xwe piştgirî dan daxwazên xwe. Beşdaran gotin ku ew ê encamên civînên Komîteya Wezîran a Konseya Ewropayê ji nêz ve bişopînin û li ser her biryarê ku derkeve helwestê bidomînin.
Di demên dawî de jî gelek siyasetmedar, akademîsyen, parêzer û parêzvanên mafên mirovan li asta navneteweyî gazî Konseya Ewropayê kirin ku biryarên Dadgeha Mafên Mirovan a Ewropayê yên têkildarî Abdullah Öcalan werin bicihanîn û Mafê Hêviyê were nasîn.
Çalakiyên Strasbourgê heta dawiya civînên Komîteya Wezîran bidomin. Beşdaran dibêjin ku armanca wan ew e ku mijarên mafên mirovan, azadî û çareseriya demokratîk di rojeva raya giştî ya navneteweyî de zindî bimînin û saziyên Ewropî li hember berpirsiyariyên xwe tevbigerin.
