‘Ma wazenê ziwanê kurdkî bi fermî bêro naskerdene’

Bi wesîleya Roja Ziwanê Dayîke ya Dinya hemserekê Sazîya Ziwanê Kurdkî yê şaristanê Dirbêsîyeyî Rizgar Mihemedî ajansê ANHA’yî rê qisey kerd û vat: “Ma sey mamoste û wendekarê kurdî yê Rojawanî wazenê peynîya polîtîkaya helênayîşî (asîmîlasyonî) bêro û goreyê xoserîya herêmanê kurdan materyalê wendişî bêrê dîyarkerdene.”

Rizgar Mihemedî ard ziwan ke ziwan seba şaran zaf girîng o û wina vat: “Şarî bi ziwanê xo yê dayîke yenê naskerdene. Naye ra, ganî giringîye bidîyo ziwanî û mîyanê komelî de aver şoro. Dewleta Sûrîye şarê kurdî yê Rojawanî ser o polîtîkaya helênayîşî ferz kerde. Qedexe kerd ke şarê kurdî bi ziwanê kurdkî qisey bikero. Bi serran, sîstemê Baasî na polîtîka sazîyanê xo de kerde pratîk û şarê kurdî ser o bandorêde xirab kerd. Labelê dima ke Şoreşê Rojawanî bi şoreşê ziwanî ame pênasekerdene, seba ke ziwanê kurdkî newe ra ganî bibo û aver şoro, zaf bedelî ameyê dayene.”

Bes nîyo

Rizgar Mihemedî dîyar kerd ke qerarnameyê 13. yo ke hetê Serekê Hukmatê Demkî yê Sûrîye Ehmed Şara ra ameyo vetiş bes nêkeno û wina domna: “Qerarê 13. heta astêk erênî yo la bes nêkeno. Ganî destûrê Sûrîye de ziwanê kurdkî fermî bêro naskerdene. Çarçeweya bendanê pêkerdişî yê mîyanê HSD û Hukmatê demkî de, ganî goreyê xoserîya herêmanê kurdan materyalanê kurdkî de gamî bêrê eştene.”

Mihemedî qalê têkoşînê şarê kurdî ya seba ziwanê kurdkî kerd û wina domna: “Şarê kurdî seba newera gandarîkerdişê ziwanê kurdkî bi seyan serrî yo têkoşîn dano. Zaf bedelê pîlî dayî. Na çarçewe de eke ziwanê kurdkî qanûnî nêro naskerdene, yeno o mana ke polîtîkaya helênayîşî ya rejîmê Baasî ya ke şarê kurdî ser o ameya meşnayene, do dewam bikera. Seba ke Sûrîye biba welatê pêro sûrîyeyijan, ganî bi ruhêkê demokratîkî newe ra bêra awankerdene.”

Rizgar Mihemedî peynîye de wina qedîna: “Ma sey mamoste û wendekarê kurdî yê Rojawanî, bi wesîleya Roja Ziwanê Dayîke ya Dinya wazenê ke ziwanê kurdkî û materyalê Rayberîya Xoserî destûrê Sûrîye de fermî bêrê naskerdene.”