Meclîsê Kirmanckîye: Vîndîbîyayîşê zazakî vîndîbîyayîşê hezaran serran o

Meclîsê Ziwanê Zazakî çarçeweya 21ê Sibate Roja Ziwanê Dayîke ya Dinya de, seba ke Zazakî vîndî nêbo, UNESCO, Serekkomarîya Tirkîya û Wezaretê Perwerdeyî yê Tirkîya rê Postaxaneyê Sûrî yê Amedî ra mektubî erşawitî. Meclîsî dima ra verê postaxaneyî de çapemenîye rê eşkerayîyêke daye. Wekîlê DEM Partî yê Amedî Serhat Eren, endam û îdarekarê komele û dezgehanê ziwanî, mamosteyê ziwanê kurdkî, endam û temsîlkarê dezgehanê sîvîlan û xeylêk kesî tewrê eşkerayîye bîyî.

Eşkerayîye de pankarta bi Kirmanckî ya ke ser o “Ez nêwazena ziwanê mi vîndî bibo” ameye akerdene û wina zî kesê ke tewrê eşkerayîye bîyî, dowîzê ke muhîmîya ziwanî îfade kenê kiriştî. Eşkerayîye bi Kirmanckî hetê Hemverfeka Meclîsê Ziwanê Zazakî Şûkran Yakute ra ameye wendene.

‘Ziwanê ke wayîrê statuyî û perwerdeyî nêbo nêeşkeno lîngan ser o bimano’

Şûkran Yakute da zanayene ke zazakî nasname, tarîx û estbîyayîş o û wina vat: “Ma nêwazenê ke ziwanê ma zazakî vîndî bibo. Seba ke ziwanê ma weş bimano, ma keye de, kuçe de û her ca de xîret kenê ke bi zazakî qisey bikerê. La ziwanê ke wayîrê statuyî nêbo, hetê perwerdeyî ra nêeşkeno lîngan ser o bimano. Ma zî seba ke zazakîya ke mîrasê Dinya, Anatolîye û Mezopotamya ya vîndî nêbo û seba waştişê perwerdeyê bi ziwanê dayîke, UNESCO, Serekkomarîye û Wezaretê Perwerdeyê Neteweyî rê mektuban erşawenê.”

‘Vîndîbîyayîşê zazakî tenya vîndîbîyayîşê yew ziwanî nîyo’

Şûkran Yakute destnîşan kerd ke zazakî yew ziwananê tewr qedîman yê cografyaya Anatolîye û Mezopotamya ya, ya ke dergûşa şaristanîyan a, û wina vat: “Zazakî mîrasêkê kulturî yê bêhempa yo ke tarîx de îrfan, xemgînî û şahîya nê erdan kirişta. La ewro, goreyê daneyanê UNESCO’yî zazakî kategorîya ‘Ziwanê ke binfîkê vîndîbîyayîşî de yê’ de ca gêna û rîyê qelsbîyayîşê vîyartişê mabênê neslan ra, rîskê bêvengmendîye dir rî bi rî ya. Vîndîbîyayîşê zazakî, tenya vîndîbîyayîşê yew ziwanî nêyo, eynî wext de yeno manayê vîndîbîyayîşê edebîyatê fekkî yê hezaran serran. Gandarîya nê ziwanî, seba pawitişê kulturî û hişmendîya ma, mesuldarîyêka tarîxî ya.”

‘Waştişê ma o yo ke gamê şênberî bêrê eştene’

Şûkran Yakute arde ziwan ke ê sey Meclîsê Ziwanê Kirmanckîye wazenê ke wa wayîrê zazakî bivejîyo û bibo wayîrê statuyî. Şûkran Yakute qiseykerdişê xo wina qedêna: “Seba qeydkerdişê Zazakî, sey mîrasêkê dinya paştdayîşê ci yê waranê akademîk û hunerîyan de, bîyayîşê ziwanê perwerdeyî û perwerdeyê ziwanê dayîke de vîyarnayîşê ci yê neslanê ameyeyan rê, waştişê ma o yo ke gamê şênberî bêrê eştene.”