MYK’yê DEM Partîye seba ‘sererastkerdişanê qanûnan’ kom bi
MYK’yê DEM Partîye, seba nîqaşkerdişê zaf babetan û ê sererastkerdişanê qanûnan ke yeno idîakerdene do çarçewaya Ravêrdeyê Aştîye û Komelê Demokratîkî de bêrê vetene, ame têhet.
Heyetê Rayberî ya Merkezî (MYK) yê Partîya Têduştîye û Demokrasîyî ya Şaran (DEM Partî), merkezê pêroyî yê partîye de binê serekîya Hemserekanê Pêroyîyan Tulay Hatimoğulları û Tuncer Bakirhanî de ameye têhet.
MYK’yê partîye do kombîyayîş de derheqê sererastkerdişanê qanûnan de ke yeno idîakerdene çarçewaya Ravêrdeyê Aştîye û Komelê Demokratîkî de bêrê amadekerdene la wextêko derg o vajîyeno zî hema nêameyê vetene, nîqaş bikero.
Nêyî ra pîya, yewna babeta kombîyayîşî pêvînayîşê ke Rayberê Şarê Kurdî Abdullah Ocalanî reyde ameyê kerdene yê. Xususê ke nê pêvînayîşan de dîqet onto ser, do mase ser o hîra-hîra bêrê ercnayene.
Kombîyayîş de eynî wext de derheqê kongreya asayî ya partîye de ke yeno pawitene mabênê aşmanê Êlule de bêra kerdene, do xebatê komîsyonanê partîye ke kerdê û ganî bikerê zî bêrê nîqaşkerdene. Yewna sernameyê kombîyayîşî zî do CHP û na çarçewa de qewimîyayîşê (averşîyayîşê) rojaneyî bê.
Yeno pawitene ke saetanê averî de wina ke kombîyayîş dewam keno, Verfeka Partîye Ayşegul Dogan do derheqê têdeyîya kombîyayîşî, nîqaşanê ke ameyê kerdene û qeraranê ke ameyê girotene de yew kombîyayîşê çapemenîye bikera.
