Ocalanî reyde muzakereyo seype, ganî TMK hewanîyo

Însîyatîfê Cinîyan ê Hewceyîya Mi bi Haştîye Est a, bi şîarê ''Ma seba haştîye îsrar kenê'' sere de Îstanbul û Amed de û gelek merkezan de eşkerayîya hempare daye. Cinîyan veng da hukmat û TBMMyî ke prosesê haştîye bi hewayêko demokratîk û mende aver şêro.

Îstanbul de Karşi Sanatê Beyogluyî de, Amed de zî Sumer Park de eşkerayî ameyî dayene. Mîyanê eşkerayîyan de bale ame antene ke mîyanê prosesî de ke Meclîs de yeno averberdene, waştişê cinîyan nêyenê goşdaritene. Eşkerayîya Amedî ya bi tirkî çalakgera Têgêrayîşê Cinîyan ê Azadan (TJA) Nure Aytemur wende, yê bi kurdkî zî Sereka Komela Cinîyan a Rosa Zeynepe Şipçik wende.

''Ganî TMK hewanîyo, tepîşteyê sîyasî verdîyê''

Mîyanê eşkerayîye de ame vatene ke ganî sîyaset peyê krîmînalîzekerdene nêro verdayene û bitaybetî ganî Qanûnê Têkoşînê Vera Terorî û serûberkerdişê ke azadîya îfadeyî û rêxistinebîyayîşî sînordar kenê, bêrê hewanayene.

Cinîyan veng da ke sere de mehkûmê nêweşî û heme tepîşteyê sîyasî bêrê veradayene. Eşkerayîye de ame vatene ke rojnamegeran, çalakwananê têgêrayîşê cinîyan, ferdanê LGBTÎ+î, sendîkakaran û pawitoxanê heqanê merdiman ser o tehekum dewam keno.

''Caardişê qeyuman ganî biqedîyo” 

Însîyatîfî waşt ke caardişê qeyumanê ê vera şaredarîyanê DEM Partî biqedîyo û qerarnameyê serokkomarîye ke demê OHALî de vejîyayî, bêrê betalkerdene. Ame vatene ke şaredarîyê ke qeyum erzîyayo, merkezê cinîyan ameyî kilîtkerdene, xizmetê zaf-ziwanî ameyî vindertene û cinîyê xebatkarî karî ra ameyî vetene. Operasyonê vera şaredarîyanê CHPyî zî ameyî rexnekerdene û veng da ke weçîniteyî agêrê wezîfeyanê xo.

''Perwerdeyo bi ziwanê dayîke û xizmeto pêroyî''

Cinîyan dîyar kerd ke bitaybetî welatanê kurdan de rîyê barîyerê ziwanî ra resayîşê xizmetanê weşîye û perwerdeyî de problemî vejîyenê. Ame vatene ke ganî heqê perwerdeyê bi ziwanê dayîke bêro naskerdene û xizmetanê pêroyî de caardişê zaf-ziwanî vila bibo. KADESo ke seba muracatanê şîdetî yê vera cinîyan yeno şuxulnayene, seba ke tede kurdkî çin o, ame rexnekerdene.

''Abdullah Ocalanî reyde muzakereyo seype''

Ame vatene ke seba averşîyayîşê prosesê haştîye ganî komel û rêxistinê cinîyan rasterast daxil bibê û Abdullah Ocalanî reyde pêdîyayîşî şertanê seypeyan de bêrê averberdene. Ame vatene: ''Ganî serûberkerdişê qanûnî yê ke naskerdişê Abdullah Ocalanî sey muzakeregero seype temîn bikerê, bêrê kerdene.''