Seba çareserîya menda ganî reformê qanûnî bêrê caardene

Hetkarê Hemserekan ê Koma DEM Partî Sezaî Temellîyî dîyar kerd ke seba vîyartişê krîzanê sîyasetê Tirkîya, ganî meseleya kurdan de gamê pratîkî bêrê eştene, muzakereyî demokratîk bibê, Îmrali de statuyo qanûnî bêro temînkerdene û qanûnêko taybet ke do heme kesan bigîro xo mîyan, bêro vetene.

''îcraat çin o, mesela zî na ya''

Temellîyî vat ke sîyasetê Tirkîya 27ê sibate 2025î de bi eşkerayîya Îmralî dest pêkerd la sîyasetî hema manaya na eşkerayî nêfehm kerd. Temellîyî dîyar kerd ke badê qerarê fesh û veşnayîşê çekan ê PKKyî, eşkerayîya îradeyê beşdarbîyayîşê sîyasetê demokratîkî ame kerdene la dima ageyrayîşî bîyî. Temellîyî vat: ''Sey DEM Partî ma berpirsîyarîyêka pîle girewte xo ser û do dewam bikerê. La çi heyf ke sîyasetê Tirkîya berpirsîyarîye nêgêno xo ser. Tay eşkerayîyê peyênî erjîyaye yê la îcraat çin o; mesela zî na ya. Sey metaforê perrêkî, bi yew perrî firrayîş nêbeno.''

''Îmrali de tecrîdo qismî yo bêname est o''

Temellîyî bale ante muhîmîya demokratîzasyonê muzakereyan ser o û vat: ''Eke muzakere yena averberdene, heta ke nêbo demokratîk, qet muzakere nîya. Demokratîzasyon bi seypêyîya heqanê hetan û dîyarkerdişê statuyê înan ê qanûnîyan mumkîn beno. Îmrali de tecrîdo qismî yo bêname est o. Vatbî 'Tecrîd qedîya' la heyetê ma zî nêeşkeno biserûber şêro. Key do şêro dîyar nîyo.''

''Kêmanî, statuyo qanûnî û qanûno taybet o''

Hemserekwekîlê Koma DEM Partî Sezaî Temellîyî dîyar kerd ke ganî şertê xebat û cuye ya Îmralîyî bêrê azadkerdene. Temellîyî vat: ''Verê ra ma vat ke ma peyê Birêz Ocalanî de yê. Pê naye zî DEM Partî nêeşkeno şêro girawe. Halbukî temînkerdişê statuyê qanûnî û azadkerdişê şertanê xebat û cuye seba averberdişê muzakereya demokratîke zaf muhîm o. Veşnayîşê çekan muhîm o la her çî veşnayîşê çekan nîyo. Rêxistine bi qerarê kongre xo fesh kerd û bi veşnayîşê çekan zî qerarîya xo nîşan da. Nika kêman,î statuyo qanûnî yo û dima qanûno 'taybet' o ke do heme kesan bigîro xo mîyan.''

''No, mudaxeleyê karê partîya sîyasî yo''

Temellîyî qerarê ''mutlaq butlan'' ê vera CHPyî zî erjna û vat ke awanîya demokratîke û problemê rejîmê Tirkîya rîyê mudaxeleyê edaletî ra warê sîyasî de krîzan xorînêr kenê. Temellîyî vat: ''Mudaxeleyê edaletî vera partîyêka sîyasî de no tena nîyo. Gama yewine ya nê mudaxeleyan dewaya Kobanê ya kumpasî bîye ke vera HDPyî ameye akerdene. No mudaxele do qebul nêbo. Eke problemî est ê, bi serûberkerdişê Qanûnê Partîyanê Sîyasîyan eşkenê bêrê safîkerdene. Bi destê edaletî mudaxeleyê gureyê zereyî yê partîyêka sîyasî, demokrasîyan de nêyeno qebulkerdene.''