Parlamenteranê DEM Partîye bi kirmanckî pêşnîyazname da Meclîs

Parlamenteranê Partîya Têduştî û Demokrasîyî yê Şaran (DEM Partîye) Salîha Aydenîze, Ayten Korduye, Adalet Kaya, Cengîz Çîçekî û Omer Faruk Hulakuyî, seba ke zaravayê kirmanckî yê kurdî yo ke hetê Rêxistina Kultur, Perwerde û Zanîstî ya Neteweyanê Yewbîyayeyan (UNESCO) ra sey "ziwanê bînê tehlukeyî" ameyo namekerdene bipawîyo, bi hetkarîya ‘Meclîsê Kirmanckîye’ Serekîya Meclîsî rê pêşnîyaznameyêk da. Parlamenteran pêşnîyazname zî bi zaravayê kirmanckî û ziwanê tirkî pêşkêşê Meclîsî kerd.

‘Dezgehê ke estê seba pawitişî bes nîyê’

Pêşnîyazname de ame destnîşankerdene ke perwerdeyê bi zaravayê kirmanckî bi derfetanê kemîyan yeno dayene û hetê weşangerîye ra zî tenya rojnameyê Azadîya Welatî, Ajansa Welatî, servîsa kirmanckî ya JINNEWS’î û tayê keyepelî weşan kenê. Heto bîn ra ame vatene ke çiqas ke Unîversîteya Munzur û Çewlîgî de bi zaravayê kirmanckî beşêk bi şiklê dersanê weçînîteyan abîyo û TRT Kurdî weşanê kirmanckî keno zî, nê bes nîyê.

‘Pawitişê mîrasî mesuldarîya dewlete ya’

Pêşnîyazname de ame dîyarkerdene ke pawitişê zaravayê kirmanckî ke mîrasêko kulturî û tarîxî yo, mesuldarîyanê dewlete ra yew o û seba nê yewî zî înan pêşnîyaznameyê cipersayîşî dayo.

Parlamenteran pêşnîyaznameyanê xo de waşt ke nê xalî bêrê cipersayene/cigêrayene:

“Bi datayan (agahîyan) tespîtkerdişê herêmanê ke tede zaravayê kirmanckî yeno qiseykerdene.

Tespîtkerdişê nê xusûsî ke qey îhtîyacîya mamosteyanê kirmanckî nîyena safîkerdene (çareserkerdene).

Tespîtkerdişê astenganê verê heqê perwerdeyê ziwanê dayîke.

Seba ke dezgehanê fermîyan de xebitnayîşê ziwanî bêro teşwîqkerdene, tespîtkerdişê qanûnanê estbîyayeyan.”

Heto bîn ra ame vatene ke binê banê Meclîsî de bi amancê “planê lezabezî” awankerdişê komîsyonêkê cipersayîşî, îhtîyacîyêka bingeyîn a.