Pawitişê ziwanî wezîfeyêko neteweyî yo

Prensîbê tewr avzêl û bingeyî yê neteweyêke ziwan o, coka ra merdim nêeşkeno vajo ke ziwan tenya wasitayêko famkerdiş û resayîşî yo. Şinasnayîş û pênasekerdişê neteweyan de ercêkê ziwanî yo manadar est o, çimkî ziwan prosesê welatperwerî û netewebîyayîşî de zî bingehêko xurt o ke rolê xo kay keno. 

Ziwan seke bingehê fikrê bîyayîşê ferdan û averşîyayîşê komelî yeno qebûlkerdene, yanê ziwan rasterast bi kamîya ferd û komelî ra têkildar o. Reyna mîyanê komelî de zî fikr, hişmendî û famkerdişêkê hemparî awan keno û beno rayîrêko avzêl semedê averşîyayîşî. Yew arizîya bînî ya ziwanî zî hergo karakterêkê neteweyî dano şaro ke pê ey ziwanî qisey keno, aye semed ra ma eşkenê vajê ke pêkameyîşê şaran de ziwan bingehê netewebîyayîş û kamilbîyayîşê fikrê neteweperwerî yo. Yanê ziwan kamîya şaran û bingehê neteweperwerî yo, ti şar nêeşkeno neteweperîyêka bê ziwan awan bikero, çimkî rayîrê tewr bi hêzo ke girseyan keno yew ziwan o. Seke aseno ziwan semedê welat û neteweyan persêko zaf avzêl o û pawitişê ci zî wazîfeyêko neteweyî yo. 

Avzêlîya pawitişê ziwanî

Ziwan; estbîyayîş, kamî, yewî û vîrê hempar yê şarêkî yo, heme neteweyî kultur, tarîx, urf û edetanê xo bi rayîrê ziwanî neqlê nifşanê xo yê neweyan kenê, ancî bi rayîrê ziwanê xo vîyarte û îstîqbalê xo pawenê. Bi kilmêkî manaya pawitişê ziwanî, pawitişê heme arizîyanê şar û welatêkî yo. 

Şarê ke ziwanê xo vîra keno, yewna şaran ra hesibîyeno û dima nameyê ci zî nêmaneno. Yanê estbîyayîşê heme şaran girêdayîya ziwanê înan o, eke ziwanê şarêkî bêro asîmîlekerdiş û nêmano bêguman o şar zî çinê yeno hesabnayîşê, yan zî eke şarêk ziwanê xo ca verdo, êdî qala ey şarî nêno kerdişê. Dinya de heta nika zaf şarî seba ke ziwanê xo nêpawitê tarîxî ra vîndî bîyê şîyê û hema nika zî zaf şarê ke bi xetereyê vîndîbîyayîşê ra rî bi rî mendê estê û çi heyfo ke ê şaran ra yew zî ma kurdî yê. 

Seke ma pêro zî zanenê seserre ra veşêr o ke dagirkerdoxê welatî, ziwanê ma qedexe û înkar kenê û çi heyfo ke ê pêlanê asîmîlasyonî ver ra ziwanê ma roj bi roj helîyena û ewro bi milyonan kurdê ma ziwanê xo, xo vîra kerdê û asîmîle bîyê. 

Seke ma cor de roşn kerd, ziwan kirîterê tewr pîl yê netewebîyayîşê yo, ma zî eşkenê ziwanê xo bikerê çime û bingeyê yewîya xo yê neteweyî û bi no qeydeyê vera duşmenan de welat, kamî, dîrok û estbîyayîşê xo bipawê. Xora ziwanê ma hergo vera dagirkerdoxan de ma rê bîyo bingehê şoreşan û hêzê xoverdayîşê. Ziwanê kurdkî heta nika bi helbestî, deyîrî, lawikî û bi qalanê xo yê sîyasî hewn û cehdê şarê ma girewt polanê xo ser. Aye semed ra zî wexto ke merdim ewnîyeno tesîr, rol û helwesta ziwanî, merdim baş fam keno ke pawitişê ziwanê ma (Kirdkî), pawitişê her çî û welatê (Kurdistan) ma yo. 

Bêguman nika ra tepîya pawitişê ziwanî wezîfeyê ma pêroyinan ê, xora rewşê ma yê ewroyêne de bê statû pawitişê ci zî mumkin nîyo, aye ra ganî ma pêro derfetanê xo semedê pawitişê ziwanî serferber bikerê. Ewro heme kes û hetê ke xo Kurdî (Zaza, Kirdas) vînenê û xora vanê ma kurd ê û ziwanê ma zî kurdkî yo ganî vernî de binê alaya ziwanê kurdkî de bêrê têhet û yewîya xo ya neteweyî awan bikerê.